Mae pobl Jamaica yn asesu maint y difrod mae'r storm “fwyaf pwerus” erioed wedi ei adael ar y wlad, tra fod y corwynt bellach wedi cyrraedd Ciwba.

Roedd arbenigwyr wedi rhybuddio mai Corwynt Melissa oedd y corwynt mwyaf pwerus erioed i daro Jamaica gyda gwyntoedd hyd at 185mya, a hyd at 101cm (40 modfedd) o law ar draws yr ynys dros yr oriau diwethaf. 

Mae'r corwynt bellach wedi cyrraedd arfordir Ciwba gyda gwyntoedd 120mya eisoes wedi eu cofnodi.

Yn Jamaica, mae'r Prif Weinidog, Andrew Holness wedi datgan "stad o argyfwng" ac yn rhybuddio y bydd "effeithiau dinistriol" y storm i'w weld wrth i'r wawr dorri ar draws yr ynys, ond mae llywodraeth y wlad wedi rhybuddio eu bod yn paratoi ar gyfer difrod sylweddol i gartrefi ac ysbytai.

Dyma'r storm fwyaf ffyrnig i daro unrhyw le yn y byd hyd yma eleni, yn ôl yr arbenigwyr. 

Fe darodd y storm Jamaica yn ystod dydd Mawrth, gyda gwyntoedd cryfion oedd yn “peri peryg i fywyd” ddechrau chwythu fore Mawrth. 

Mae’r rhan fwyaf o’r wlad wedi wynebu'r amodau tywydd eithafol, gyda'r tywydd ar ei waethaf yng ngorllewin y wlad, yn bennaf yn ardal Bae Montego.

Roedd y storm wedi ei dynodi fel un categori pump [y math gwaethaf] cyn i'r storm daro'r ynys, ond fe gafodd y storm ei hisraddio i gategori tri fel symudodd y corwynt dros wlad.

Gan fod y storm wedi symud ar draws gorllewin yr ynys, fe lwyddodd y brifddinas, Kingston i osgoi'r tywydd gwaethaf un.

Mae adroddiadau fore Mercher fod 80% o'r wlad wedi colli eu cyflenwad trydan yn llwyr ar hyn o bryd.

Ar hyn o bryd mae Corwynt Melissa wedi dechrau symud yn gyflymach i gyfeiriad ynys Cuba.

Fe gyhoeddodd Gweinyddiaeth Iechyd a Llesiant Jamaica bod tri o bobl eisoes wedi marw, a hynny “yn gysylltiedig â’r storm” ddydd Llun. 

Bu farw’r tri o bobl wedi iddyn nhw fod yn torri coed er mwyn paratoi ar gyfer y storm, meddai’r gweinidog Iechyd a Llesiant Christopher Tufton ddydd Llun. 

Cafodd un person ei ladd yn dilyn sioc drydanol, tra bod dau berson wedi marw ar ôl i goed cwympo arnyn nhw. 

Mae’r corwynt hefyd wedi bod yn gyfrifol am o leiaf tri o farwolaethau yn Haiti ac un arall yng Ngweriniaeth Dominica.

Ar ôl taro Ciwba, mae rhagolygon yn dangos fod disgwyl i'r corwynt symud i'r gogledd-ddwyrain tuag at y Bahamas a Bermuda.