Mae teulu menyw a fu farw mewn gwrthdrawiad ffordd yn y Barri, Bro Morgannwg wedi rhoi teyrnged iddi.

Bu farw Jacqueline Ellis yn dilyn gwrthdrawiad ar Ffordd Y Mileniwm yn y dref, ddydd Llun 29 Medi.

Roedd y gwrthdrawiad rhwng car Mercedes C220 du, a Jacqueline Ellis, a oedd yn cerdded ar y pryd. 

Cafodd ei chludo i'r ysbyty yn dilyn y gwrthdrawiad, ond bu farw ar 10 Hydref.

'Calon o aur'

Wrth roi teyrnged iddi, dywedodd teulu Jacqueline Ellis bod ganddi "galon o aur".

"Bydd marwolaeth sydyn Jacqueline mewn amgylchiadau mor ddinistriol yn gadael gwagle na fydd fyth yn cael ei lenwi," meddai'r teulu.

"Roedd gan Jacqueline galon o aur a byddai'n gwneud unrhyw beth i unrhyw un."

Fe aeth y datganiad ymlaen i ddweud ei bod yn "fam, fam-gu a hen fam-gu ymroddedig".

"Bydd ein hatgofion o Jacqueline yn para am oes ac ni fydd yr atgofion sydd gennym gyda'n gilydd fel teulu fyth yn cael eu hanghofio," meddai'r teulu.

"Fel teulu hoffem ddiolch i bawb sydd wedi anfon negeseuon o gefnogaeth ac rydym yn gofyn nawr am amser i alaru gyda'n gilydd."

Mae'r heddlu yn annog unrhyw un a allai fod wedi gweld y digwyddiad, neu sydd â lluniau i gysylltu â nhw gan ddyfynnu'r cyfeirnod 2500312080.