Image
Carcharu bachgen am drywanu ei gyd-ddisgybl i farwolaeth
Mae bachgen 15 oed a drywanodd ei gyd-ddisgybl i farwolaeth yn ystod egwyl amser cinio mewn ysgol wedi cael ei garcharu am o leiaf 16 mlynedd.
Fe wnaeth Mohammed Umar Khan drywanu Harvey Willgoose yn ei galon gyda chyllell hela yn Ysgol Uwchradd Gatholig All Saints yn Sheffield fis Chwefror.
Clywodd Llys y Goron Sheffield fod disgyblion eraill wedi ffoi "mewn ofn a phanig", gyda rhai yn cloi eu hunain mewn cwpwrdd ysgol wedi'r ymosodiad.
Cafwyd Khan yn euog o lofruddiaeth ym mis Awst, ond nid oedd modd ei enwi'n flaenorol am resymau cyfreithiol.
Mae chwaer Harvey, Sophie, wedi disgrifio'r llofruddiaeth fel "nid trosedd yn erbyn fy mrawd yn unig, ond trosedd yn erbyn pob un ohonom oedd yn ei garu".
Yn ystod ei wrandawiad dedfrydu ddydd Mercher, dywedodd y barnwr Mrs Justice Ellenbogen wrth y diffynnydd: "Chi oedd yr ymosodwr ac fe wnaethoch chi weithredu gyda niwed a dicter at yr hyn yr oeddech chi'n ei ystyried yn frad o'ch cyfeillgarwch."
Ni ddangosodd Khan unrhyw ymateb wrth iddo sefyll yn y doc, gyda theulu Harvey yn edrych i lawr ar y diffynnydd o'r oriel gyhoeddus.
'Trosedd difrifol'
Ddydd Mercher, cytunodd y barnwr i godi gorchymyn a oedd yn gwahardd Khan rhag cael ei adnabod yn dilyn ceisiadau gan y cyfryngau.
Dywedodd y barnwr wrth y llys fod yn rhaid iddi gydbwyso'r angen i adrodd yn llawn am achos difrifol iawn gyda lles y diffynnydd, sy'n troi'n 16 y mis nesaf.
"Roedd hon yn drosedd ddifrifol a gyflawnwyd gan un disgybl ar un arall ar dir yr ysgol gyda chyllell a ddaeth ag ef i'r ysgol," meddai Mrs Justice Ellenbogen.
"Cafodd ei gweld i wahanol raddau gan ddisgyblion ac athrawon eraill.
"Bydd y cyhoedd yn dymuno gwybod pwy yw'r rhai sy'n cyflawni troseddau o'r fath wrth geisio deall sut y gall plentyn o'r oedran hwnnw wneud hynny."
Roedd rhieni Harvey, Mark a Caroline, yn gwylio o res gefn yr oriel gyhoeddus gydag aelodau eraill o'r teulu, gan gynnwys ei chwaer, Sophie.
Yn ei datganiad i'r llys, dywedodd chwaer Harvey fod ei theulu yn "cael trafferth deall y ffaith bod Harvey wedi'i lofruddio yn y ffordd fwyaf creulon ac annynol".
Dywedodd: "Nid trosedd yn erbyn fy mrawd yn unig oedd hwn, roedd yn drosedd yn erbyn pob un ohonom a oedd yn ei garu."
Fe aeth ymlaen i ddweud y byddai'r "boen yn aros gyda ni am weddill ein hoes".
"Rydym eisiau cyfiawnder nid yn unig i Harvey, ond i'r teulu a fydd yn cario ei golled am byth," meddai.
Dywedodd Sophie Willgoose fod y teulu wedi gorfod "dioddef" a’u bod yn cael eu "taro’n ddyddiol" gan y lluniau teledu cylch cyfyng o’r llofruddiaeth oherwydd bod Khan wedi "gwrthod cymryd unrhyw gyfrifoldeb" am yr hyn a wnaeth.
Dywedodd wrth y llys: "Ni wnaeth y diffynnydd ladd bywyd Harvey yn unig, fe wnaeth ladd ein bywyd ni hefyd."
Gwyliodd y rheithgor luniau teledu cylch cyfyng o’r digwyddiad a ddangosodd sut y trywanodd Harvey ddwywaith.
Fe wnaeth un o'r ergydion dorri drwy un o’i asennau a thyllu ei galon.
Clywodd y rheithgor fod Khan wedi dweud wrth bennaeth Ysgol Uwchradd Gatholig All Saints, Sean Pender, yn syth ar ôl y trywanu: "Dydw i ddim yn iawn yn fy mhen. Dydy fy mam ddim yn gofalu amdanaf i’n iawn."
Fe wnaeth pennaeth cynorthwyol yr ysgol, Morgan Davis, gymryd y gyllell oddi ar y diffynnydd a’i glywed yn dweud "rydych chi’n gwybod na allaf ei reoli".
Roedd yr athro wedi cymryd bod hyn yn gyfeiriad at ei broblemau dicter, o ystyried digwyddiadau blaenorol o ymddygiad treisgar yn yr ysgol.
Dywedodd Ysgol Uwchradd Gatholig All Saints mewn datganiad yn dilyn y gwrandawiad dedfrydu fod yr ysgol a’r ymddiriedolaeth wedi "gallu ymgysylltu’n llawn â nifer o ymchwiliadau parhaus sydd â’r nod o ateb cwestiynau allweddol am farwolaeth drasig Harvey".
