Mae menyw o Abertawe wedi ei charcharu am gynnau tân yn fwriadol mewn bwyty McDonalds yn y ddinas.

Cafodd Leah Hocking, 39 oed ei dedfrydu i chwe mis dan glo ar ôl cynnau'r tân yn y bwyty yng nghanol dinas Abertawe.

Fe wnaeth hi gerdded mewn i McDonalds cyn cynnau'r tân ar un o'r byrddau ar Mawrth 4 eleni.

Hefyd roedd hi wedi dwyn ffôn symudol gan berson arall yn y bwyty McDonalds, cyn dechrau cicio'r heddlu wrth iddyn nhw geisio ei harestio.

Plediodd yn euog i gyhuddiadau o losgi bwriadol, lladrad ac ymosod ar weithiwr y gwasanaethau brys.

Yn ogystal roedd Hocking wedi pledio'n euog i achosi difrod troseddol gwerth llai na £5,000 ar ôl cyfaddef i ddifrodi drws siop goffi yng nghanol y ddinas ar yr un diwrnod.

Dywedodd y cwnstabl Abbi Crocker o Heddlu De Cymru"nad oes lle i ymddygiad gwrthgymdeithasol ar strydoedd Abertawe".

“Roedd ymddygiad Leah Hocking yn ddifeddwl ac nid oedd hi’n poeni am achosi niwed iddi hi ei hun nac i eraill," meddai.

“Nid yw ymddygiad anghyfrifol a gwrthgymdeithasol yn cael ei dderbyn o gwbl ar strydoedd y ddinas.

“Mae pobl fel Hocking yn gwneud i bobl ofni dod i ganol y ddinas oherwydd pryder am gael eu targedu heb unrhyw reswm amlwg. Mae hi’n haeddu ei chyfnod yn y carchar.”