Bwriad y cynllun gan gwmni Lôn Pin Solar oedd creu fferm solar 4.99MW ar draws dau gae.

Roedd yn cynnwys creu ffyrdd a mynediad newydd ar gyfer cerbydau, gosod dwy orsaf drawsnewid i ddosbarthu trydan, a gosod ceblau tanddaearol.

Ond roedd pryderon y byddai'n cael effaith negyddol ar y diwydiant amaethyddol, yn ogystal â golygfeydd, llwybrau cerdded a man glanio ambiwlans awyr. 

Dywedodd rheolwr gyfarwyddwr y cwmni tu ôl i’r cynllun y byddai’r fferm solar yn cael effaith "fach iawn" ar yr ardal. 

Yn ôl Dr Chris Bale, roedd gan y cynllun nifer o "fanteision", gan gynnwys cefnogi'r diwydiant ffermio a chynnig ffrydiau incwm.

'Difetha'r dirwedd'

Roedd Angela Russell, y cynghorydd sir dros ward Llanbedrog a Mynytho, yn erbyn y cynllun.

Dywedodd: "Mae’r cais yn dweud mai fferm solar yw hon, nid fferm yw hon, mae ei galw’n fferm yn gamarweiniol.

"Sut ydw i’n disgrifio fferm? Mae’n gaeau gwyrdd, yn llawn defaid a gwartheg, ŵyn yn y gwanwyn, adar yn chwilio am leoedd i nythu, y gog yn y coed, y ffermwr yn chwibanu gyda’i gi, yn ceisio casglu ei anifeiliaid, y llwynog yn croesi’r caeau, ychydig o ffesantod, hwyaid gwyllt yn hedfan tuag at lynnoedd cyfagos, ac yn yr haf, arogl glaswellt yn cael ei dorri wrth i’r ffermwr baratoi ar gyfer y gaeaf.

"Dyma beth yw ffermio i mi, teuluoedd yn gofalu am y tir, yn cynhyrchu bwyd maethlon.

"Rwy’n adnabod y lle yma yn dda, dyma’r tir amaethyddol gorau yn Llanbedrog, 98% yn radd dau, o safon uchel iawn."