Mae twnnel Conwy ar ffordd yr A55 yn Sir Conwy wedi ailagor yn dilyn "nam" yn system diogelwch y twnnel.

Roedd traffig yn cael ei gyfeirio ar hyd ffyrdd lleol eraill fore Llun wedi i'r twnnel gau ychydig ar ôl 08.30.

Yn ôl datganiad gan Traffig Cymru am 14.51 brynhawn Llun, mae'r twnnel bellach wedi ail-agor i'r ddau gyfeiriad, ar ôl agor yn rhannol i gyfeiriad y dwyrain yn unig am gyfnod.

Inline Tweet: https://twitter.com/TrafficWalesN/status/1980270674418528257

Roedd gwaith brys wedi ei gynnal ar y safle i atgyweirio'r nam. Does dim manylion wedi'u cyhoeddi am union natur y nam.

Yn dilyn y cyhoeddiad fore Llun, dywedodd yr Aelod y Senedd dros etholaeth Aberconwy, Janet Finch-Saunders bod tagfeydd yn drwm ar y ffordd yn ymestyn yn ôl i Benmaenmawr tua'r dwyrain, a hyd at Fae Colwyn tua'r gorllewin, ac mae'r traffig yn drwm yng Nghyffordd Llandudno, meddai.

Roedd traffig yn cael ei ddargyfeirio drwy ardal Llanrwst, gan achosi tagfeydd yno'n ogystal.

Dywedodd llefarydd ar ran Llywodraeth Cymru: "Mae Twnnel Conwy wedi cau oherwydd nam a nodwyd gyda’r systemau diogelwch yn y twnnel. 

"Mae gwaith yn mynd rhagddo’n gyflym i ymchwilio i’r nam a’i gywiro cyn gynted â phosibl. 

"Er mwyn sicrhau diogelwch y cyhoedd sy’n teithio, nid yw’n bosibl i gerbydau fynd trwy’r twnnel nes bod y nam wedi’i drwsio, ac fe fyddwn yn darparu’r wybodaeth ddiweddaraf drwy wasanaeth Traffig Cymru, ac rydym yn annog pobl i ganiatáu mwy o amser ar gyfer teithio yn y cyfamser."

Ym mis Mehefin eleni roedd yn rhaid cau'r twnnel ar ôl tân yno gan achosi oedi a thagfeydd mawr. 

Roedd yn rhaid cynnal gwaith atgyweirio wedi hynny.