Mae’r heddlu yn apelio am wybodaeth ar ôl adroddiadau am ddynion arfog mewn stryd yn nwyrain Caerdydd ddydd Sadwrn.

Roedd llygad dystion wedi gweld grŵp o dri o ddynion yn cario arfau yn mynd i gyfeiriad seiclwr gwrywaidd ar gyffordd Ffordd Aberdaron a Ffordd Trowbridge tua 17.00.

Yna fe wnaethon nhw adael yr ardal mewn fan wen.

Nid yw hunaniaeth y dynion arfog na’r seiclwr yn hysbys ar hyn o bryd ac mae swyddogion yn apelio am wybodaeth.

“Rydym yn arbennig o awyddus i wirio lles y dyn ar y beic ac yn ei annog ef neu unrhyw un sydd â gwybodaeth i gysylltu,” meddai llefarydd ar ran Heddlu De Cymru.

Dywedodd llygaid dystion ei fod yn ddyn gwyn, o uchder cyffredin, gyda chorff tenau, ac roedd yn gwisgo tracsiwt lwyd.

Mae Heddlu De Cymru yn gofyn i unrhyw un sydd â phryderon neu wybodaeth gysylltu â nhw gan ddyfynnu cyfeirnod 2500333667.