Mae ymgyrch wedi’i lansio er mwyn codi ymwybyddiaeth am bryderon rhedwyr benywaidd am eu diogelwch wrth redeg dros gyfnod yr hydref a'r gaeaf.

Gydag ymchwil yn dangos bod 72% o fenywod yn newid eu gweithgareddau ymarfer corff dros y gaeaf, mae Athletau Cymru a Heddlu De Cymru wedi dechrau ymgyrch o’r enw ‘Ein Nos Ni’.

Nod y cynllun yw codi ymwybyddiaeth o bryderon menywod am eu diogelwch, addysgu cymunedau rhedeg ar sut i gefnogi menywod, a rhoi hyder i fenywod.

Bydd digwyddiadau ‘Hawlio’r Strydoedd’ yn cael eu cynnal yng Nghaerdydd, Abertawe a Bae Colwyn ar ddydd Sul 26 Hydref, yn gwahodd clybiau rhedeg a rhedwyr i redeg gyda’i gilydd, wedi’r clociau fynd yn ôl.

Dywedodd y Ditectif Uwch-arolygydd Tracey Rankine, pennaeth yr heddlu ar gyfer Trais yn Erbyn Menywod a Merched yn Heddlu De Cymru: "Mae'n hollol annerbyniol bod menywod yn newid eu llwybrau rhedeg, yn osgoi rhai lleoliadau neu ddim yn rhedeg gyda'r nos oherwydd ymddygiad pobl eraill. 

Inline Tweet: https://twitter.com/WelshAthletics/status/1975658412571574528

“Mae pawb yn haeddu bod a theimlo'n ddiogel a mwynhau ein mannau cyhoeddus, heb ofn.”

Dywedodd y byddai swyddogion yn mynychu digwyddiadau parkrun ar foreau Sadwrn er mwyn “rhoi sicrwydd i bobl a gwrando ar bryderon”.

Fe ychwanegodd. "Rwy'n annog unrhyw un sy'n profi aflonyddu neu fygythiad i roi gwybod i'r heddlu am unrhyw bryderon fel y gallwn roi diwedd ar yr ymddygiad hwn."

Afloynyddu

Yn ôl adroddiad diweddar gan Our Streets, fe wnaeth 93% o bobl a wnaeth ymateb i holiadur ddweud eu bod wedi profi rhyw fath o aflonyddu rhywiol cyhoeddus wrth redeg. 

Mae ymchwil gan This Girl Can hefyd wedi dangos bod 24% o fenywod yn newid llwybrau rhedeg i rai sydd wedi’u goleuo’n dda, tra bod 20% yn edrych y tu ôl iddynt i sicrhau nad ydynt yn cael eu dilyn.

Fe fydd cyfres o drafodaethau ar-lein hefyd yn cael eu cynnal er mwyn rhannu gwybodaeth a chyngor am sut i gadw’n ddiogel.

Dywedodd llefarydd ar ran Athletau Cymru: “Mae mwy o fenywod yn rhedeg yng Nghymru nag erioed, er mwyn cymryd rhan mewn rasus, ymuno â chlybiau a grwpiau, neu i redeg er mwyn eu lles corfforol a meddyliol.

“Mae'n amlwg bod angen gwneud gwaith i sicrhau bod rhedeg yn hygyrch ac yn ddiogel i bawb sydd eisiau cymryd rhan.

“Rydym am rymuso menywod a chynyddu eu hyder i barhau i fod yn egnïol o'r Hydref ymlaen.”