Cynnal sioeau amaethyddol yn ‘gam aruthrol’ i les ffermwyr
Cynnal sioeau amaethyddol yn ‘gam aruthrol’ i les ffermwyr
Mae’r ffaith bod sioeau amaethyddol yn gallu cael eu cynnal eleni yn “gam aruthrol”, yn ôl elusen sy’n cefnogi iechyd meddwl pobl yn y diwydiant amaeth.
Daw’r sylwadau ar drothwy ail ddiwrnod Sioe Amaethyddol Sir Benfro.
Nid oedd yn bosib cynnal y sioe'r llynedd o ganlyniad i’r pandemig.
Ond eleni mae’r sioe yn ôl ar gyfer cystadleuwyr ac aelodau cymdeithas y sioe, gyda digwyddiad deuddydd yn hytrach na’r tridiau arferol.
Dywed trefnwyr y sioe eu bod yn gobeithio gallu cynnal sioe “hynod arbennig” yn 2022.
Dywedodd Angharad Edwards, Llysgennad Sioe Amaethyddol Sir Benfro 2021: “O’dd e yn hynod hynod bwysig ‘leni bod rhwbeth yn gallu digwydd.
“Yn amlwg, mae tipyn yn llai o sioe na’ ni’n gyfarwydd â hi ond na, mae jyst yn gyfle i adeiladu pethe lan ‘to, dechre o’r gwaelod falle a jyst cael dechre’n syml a gobeitho adeiladu arno flwyddyn ar ôl blwyddyn o fan hyn ‘mlaen”.
‘Pinacl y flwyddyn’
Mae gallu cwrdd wyneb yn wyneb unwaith eto yn golygu tipyn i ffermwyr, yn ôl cynrychiolydd o elusen Tir Dewi.
Dywedodd Wyn Thomas wrth Newyddion S4C: “Dou beth ma’ ffermwyr wedi bod yn gweud drw’ gyfnod Covid yw bod nhw’n gweld ishe mynd i’r marts a bo nhw’n gweld ishe’r sioeau.
“Chimod, ma’ hwn yn binacl y flwyddyn, cyfnod y sioeau, i ffermwyr yn amal iawn”.
Cafodd Tir Dewi ei lansio yn ystod haf 2015, mewn ymateb i’r “angen difrifol” am rywun i gynorthwyo ffermwyr y gorllewin mewn cyfnodau heriol.
Mae’r elusen yn cynnig llinell gymorth, gwasanaeth i wrando a chynnig cyngor.
Ychwanegodd Mr Thomas: “Mae e’n fwy na’ jyst diwrnod mas, mae e’n wyliau iddyn nhw a ma’ dechre dod ‘nôl i gwrdd â’n gilydd, mae e’n gam aruthrol a ma’ pawb ni ‘di gweld yma wedi bod yn gweud pwy mor hyfryd yw hi i gael gweld pobol ‘to”.
‘Andros o bwysig’
Mae pwysigrwydd y sioeau amaethyddol i lesiant ffermwyr hefyd wedi ei gydnabod gan elusennau eraill hefyd, gan gynnwys Sefydliad DPJ.
Cafodd yr elusen ei sefydlu yn 2016 yn dilyn marwolaeth Daniel Picton-Jones.
Yn dilyn hunanladdiad Daniel, sefydlodd ei wraig Emma gronfa i gefnogi pobl sy’n byw gydag iechyd meddwl isel.
Dywedodd Elen Williams o Sefydliad DPJ fod y pandemig a'r cyfnod clo wedi bod yn arbennig o anodd i ffermwyr.
Dywedodd wrth Newyddion S4C: “Mae diwrnod allan i’r farchnad neu i sioeau ‘di bod yn fwy na’ jyst dangos livestock a ballu, mae o’n rhan o gael sgwrs neu gweld ffrind ‘da chi’m ‘di gweld ers oes a mae o ‘di bo’n andros o bwysig i bobol gallu cael siarad fel ‘na.
“So mae o’n neis iawn bo ni’n cael dod ‘nôl allan i’r sioeau bach neu mawr ag yn ôl i’r gymdeithas i gael siarad efo bobol a ffrindia’”.
Wrth i’r cyfyngiadau lacio a gyda chyfnod y sioeau yn ei hanterth, gobaith yr elusennau yw y bydd mwy o ffermwyr yn ymwybodol bod cymorth ar gael ac yn cymryd y cyfle i rannu eu teimladau.