Mae llys ieuenctid wedi clywed ddydd Iau fod bachgen 15 oed wedi berwi tegell a’i daflu dros ben dynes oedd yn gofalu amdano yng Nghorwen.

Fe wnaeth y gofalwr ddioddef llosgiadau poenus, pothelli a chreithiau dros 9% o’i chorff o ganlyniad i’r ymosodiad ym mis Awst.

Fe wnaeth y bachgen gyfaddef i achosi niwed corfforol difrifol gyda bwriad yn y gwrandawiad yn y llys ieuenctid yn Llandudno.

Clywodd cadeirydd y llys, David Subacchi ei fod hefyd wedi dwyn o siop ym mis Gorffennaf.

Mewn fideo a gafodd ei chwarae yn y llys dywedodd y dioddefwr Rachel Jones ei bod hi’n dal mewn poen.

Roedd hi wedi ei chludo mewn ambiwlans i Ysbyty Whiston, Glannau Merswy, i gael triniaeth.

"Mae'n fy ngwneud yn flin oherwydd ei fod wedi'i wneud yn fwriadol,” meddai.

“Doeddwn i ddim wedi dweud wrtho na allai wneud dim. Gofynnais iddo olchi llestri yn gyntaf, woc, ei blât a'i gyllell a'i fforc. 

“Roedd o’n bum munud o waith."

Dywedodd yr erlynydd James Ashton bod y bachgen wedi dweud wrth staff gofal tua wythnos cyn yr ymosodiad nad oedd am i'r dioddefwr edrych ar ei ôl.

Roedd wedi datgan y byddai'n gwneud "beth bynnag oedd ei angen i wneud i bobl wrando”.

Dywedodd y cyfreithiwr oedd yn amddiffyn y bachgen, Craig Hutchinson, ei fod yn ddigwyddiad difrifol ond ei fod yn fachgen oedd yn “agored i niwed”.

Gohiriwyd y dedfrydu er mwyn i'r gwasanaeth cyfiawnder ieuenctid baratoi adroddiad ar gyfer y llys.

Cafodd y bachgen ei gadw mewn llety diogel.

Llun: Llys Ynadon Llandudno sy'n cynnwys y Llys Ieuenctid.