Mae Prifysgol Caerdydd yn wynebu beirniadaeth yn dilyn agor campws newydd i'r brifysgol yn Kazakhstan, mewn cyfnod o doriadau a cholli swyddi ymysg ei staff yng Nghymru.

O ddiwedd mis Medi ymlaen, mae Prifysgol Caerdydd Kazakhstan yn derbyn myfyrwyr i raglenni israddedig pedair blynedd gan gynnwys Cyfrifiadureg, Rheoli Busnes, Peirianneg Sifil a Daeareg Archwilio.

Cafodd y campws yn Astana, prifddinas y wlad, ei agor yn swyddogol ar 3 Medi. 

Mae'r wlad wedi dod o dan y lach am ei record hawliau dynol ond mae Prifysgol Caerdydd yn dweud bod camau diwydrwydd dyladwy ('due dilligence') wedi eu dilyn cyn agor y campws newydd.

Yn gynharach eleni roedd pryder y byddai hyd at 400 o swyddi'n cael eu colli yng Nghaerdydd. Erbyn mis Mai roedd nifer y toriadau wedi gostwng i 138 meddai'r brifysgol.

Ar ddechrau’r flwyddyn, fe wnaeth y brifysgol lansio ymgynghoriad ffurfiol ar newidiadau arfaethedig "gyda’r bwriad o ddiogelu ei dyfodol hirdymor."

'Poeni am enw da'

Wrth nodi agoriad swyddogol campws newydd y brifysgol yn Kazakhstan, dywedodd Is-Ganghellor Prifysgol Caerdydd, yr Athro Wendy Larner mewn datganiad: “Roeddwn wrth fy modd yn agor ein campws yn Astana yn swyddogol – campws rhanbarthol rhyngwladol cyntaf Prifysgol Caerdydd.

“Edrychwn ymlaen at groesawu’r garfan gyntaf o fyfyrwyr sy’n academaidd ragorol yn nes ymlaen y mis hwn. 

"Ni yw prifysgol gyntaf Grŵp Russell y DU i agor campws yn Kazakhstan, sef cam pwysig yn ein huchelgais fyd-eang at y dyfodol.

“Rydyn ni’n rhannu uchelgais Kazakhstan i fod yn fan cyfarfod addysgol rhyngwladol, gan ehangu addysg uwch yn brif ysgogydd datblygiad a ffyniant y wlad yn y dyfodol.”

Mae undeb sydd yn cynrychioli darlithwyr y brifysgol yng Nghaerdydd wedi lleisio pryderon am y campws newydd. 

Wrth siarad gyda'r BBC, dywedodd llefarydd undeb UCU, Andy Williams: "Mae hon yn wlad sydd â record wael o ran hawliau dynol a record wael o ran amddiffyn buddiannau a bywydau pobl hoyw yn benodol - rydym yn poeni am hynny," meddai.

"Rydym yn poeni am y risgiau i enw da Prifysgol Caerdydd pe bai hyn yn mynd o chwith."