Mae cadeirydd cymdeithas achubwyr mynydd gogledd Cymru wedi galw ar bobl i dalu sylw i rybuddion tywydd ar ôl i ddau unigolyn gael eu hachub o gopa Cader Idris ynghanol Storm Amy.

Dywedodd Tîm Canfod ac Achub Aberdyfi eu bod nhw wedi achub dau gerddwr ifanc a oedd wedi'u dal yn y lloches ar y copa nos Sadwrn.

Roedd hynny ynghanol rhybudd melyn am wynt dros Gymru gyfan drwy gydol y penwythnos.

Cyrhaeddodd yr achubwyr y cerddwyr ar y copa toc cyn 22.00, gan ddod â diodydd poeth a dillad cynnes i'w helpu i ymdopi â'r amodau llym. 

“Er gwaethaf y tywydd gwyllt, roedden nhw wedi llwyddo i’w harwain i lawr yn ddiogel erbyn hanner awr wedi hanner nos,” medden nhw.

Dywedodd Andy Harbach, Cadeirydd Cymdeithas Achub Mynydd Gogledd Cymru (NWMRA) bod angen cymryd rhagor o ofalu mewn tywydd garw. 

“Mae eich diogelwch yn bwysig, ac mae'r rhybuddion tywydd gan y Swyddfa Dywydd yn glir,” meddai.

“Mae timau achub mynydd Gogledd Cymru wedi ymateb i dros 570 o alwadau eleni. 

“Rydym yn deall bod damweiniau’n digwydd, ond mae’r nifer hwn o ddigwyddiadau’n rhoi pwysau cynyddol ar ein timau sydd i gyd yn wirfoddolwyr. 

“Mae yna bryder ymhlith timau achub mynydd y gallai’r amodau fel y rhai a brofwyd y penwythnos hwn, atal hyd yn oed y gwirfoddolwyr achub mynydd profiadol, er gwaethaf ein hyfforddiant, ein sgiliau, ein profiad a’n gwybodaeth am y tir, rhag cyrraedd atoch mewn pryd - neu o gwbl.

“Felly peidiwch â’ch rhoi eich hunain mewn perygl, mwynhewch ein tirwedd hardd, ond efallai gadewch y copaon, y tir uchel a chribau agored at ddiwrnod arall.”