Mae cyn gapten rygbi Lloegr, Lewis Moody wedi dweud bod ganddo'r clefyd Motor Niwron.

Wrth siarad gyda'r BBC dywedodd Moody, sy'n 47 oed nad ydy o eisiau meddwl i'r dyfodol ar hyn o bryd.

"Mae rhywbeth am edrych i'r dyfodol a pheidio â bod eisiau prosesu hynny ar hyn o bryd," meddai.

"Nid nad ydw i'n deall i ble mae'n mynd. Rydyn ni'n deall hynny. Ond mae yna amharodrwydd llwyr i edrych i'r dyfodol am y tro."

Fe wnaeth Moody a gafodd 71 cap i Loegr ddarganfod bod ganddo'r clefyd ar ôl sylwi bod ganddo wendid yn ei ysgwydd tra yn y gampfa.

Fe ddangosodd sganiau bod niwed wedi ei wneud i'w ymennydd a'r llinyn cefn yn sgil y clefyd.

Mae'n dweud ei fod yn teimlo yn iawn.

"Rwy'n dal yn gallu gwneud unrhyw beth a phopeth," meddai. "A gobeithio y bydd hynny'n parhau am gymaint ag sy'n bosib."

Does dim iachâd ar gyfer y clefyd ac mae'n bosib gweld dirywiad yn gyflym. Dim ond arafu'r dirywiad mae triniaeth yn gallu ei wneud ar hyn o bryd.

'Torcalonnus'

Yn ôl Lewis Moody roedd dweud wrth ei blant sydd yn 15 ac 17 oed am y diagnosis yn anodd.

"Maen nhw'n ddau fachgen gwych ac mi oedd hynny yn reit dorcalonnus," meddai.

Mae athletwyr ar y lefel uchaf yn cael eu heffeithio fwy gyda'r clefyd Motor Niwron. Y gred yw bod ymarfer caled cyson yn medru sbarduno'r clefyd i'r rhai sydd yn fwy tebygol o safbwynt geneteg i'w gael.

Ymhlith y chwaraewyr rygbi sydd wedi cael y clefyd mae Ed Slater a Doddie Weir a Rob Burrow sydd erbyn hyn wedi marw.

Byw yn y foment yw'r hyn sydd yn bwysig i Moody, meddai.

Mae'n dweud ei fod yn hyderus y bydd y gymuned rygbi yn gefn iddo.

"Mae rygbi yn gymuned mor wych," meddai.

"O'n i yn dweud wrth y plant y diwrnod o'r blaen. Dwi wedi cael bywyd anhygoel. 

"Os y byddai popeth yn dod i ben rŵan, dwi wedi mwynhau'r cyfan ac wedi cofleidio popeth ac wedi cael gwneud y cyfan efo pobl anhygoel."