Robbie Williams yn canslo sioe olaf ei daith fyd-eang am resymau diogelwch
Mae Robbie Williams wedi dweud bod yn rhaid iddo ganslo sioe olaf ei daith fyd-eang yn Nhwrci am resymau diogelwch.
Dywedodd y cyn-aelod o'r grŵp Take That, sy'n 51 oed, bod perfformio yn Marina Atakoy yn Istanbul ddydd Mawrth yn "freuddwyd", ond bod penderfyniad awdurdodau'r ddinas i ganslo'r cyngerdd "y tu hwnt i'n rheolaeth".
Dechreuodd taith Britpop Williams ym mis Mai ac mae wedi teithio i ddinasoedd gan gynnwys Llundain, Amsterdam, Berlin, Helsinki ac Athen.
Mewn neges ar Instagram, dywedodd: "Y peth olaf y byddwn i byth eisiau ei wneud yw peryglu diogelwch fy nghefnogwyr - eu diogelwch nhw sy'n dod yn gyntaf.
"Roedden ni'n gyffrous iawn i fod yn chwarae yn Istanbul am y tro cyntaf, ac yn fwriadol dewison ni'r ddinas fel sioe olaf y daith Britpop.
"Roedd dod â'r daith epig i ben o flaen fy nghefnogwyr Twrcaidd yn freuddwyd, o ystyried y cysylltiadau agos sydd gan fy nheulu â'r wlad ryfeddol hon."
Ychwanegodd: "I bawb yn Istanbul a oedd eisiau ymuno â'r 1.2 miliwn o bobl sydd wedi rhannu'r daith ryfeddol gyda ni eleni, mae'n ddrwg iawn gen i.
"Roedden ni'n edrych ymlaen yn fawr at y sioe, ond roedd y penderfyniad i'w chanslo y tu hwnt i'n rheolaeth."
Mae disgwyl i Williams berfformio gig bach yn Dingwalls yn Camden, Llundain ddydd Iau.
Ar ôl gadael Take That yn 1995, rhyddhaodd Williams ei albwm cyntaf a gyrhaeddodd frig y siartiau yn 1997.
Mae wedi cyflawni saith sengl rhif un a 15 albwm rhif un yn y DU.
Llun: Drew de Fawkes / Wikimedia Commons
