Mae cartrefi ar draws Cymru yn parhau heb drydan fore Sul wedi i Storm Amy achosi trafferthion ar draws y wlad.

Dywedodd SP Energy Networks fod 450 o gartrefi heb drydan yn y gogledd, gyda'r Grid Cenedlaethol yn adrodd bod tua 450 heb drydan yn y de a'r gorllewin.

Mae'r storm, sef y gyntaf i gael ei henwi gan y Swyddfa Dywydd yn nhymor 2025/26, hefyd wedi achosi trafferthion i deithwyr ar draws y wlad.

Er i'r storm achosi nifer o goed i gwympo yng nghanol y brifddinas fore Sadwrn, mae'r ffyrdd bellach wedi eu clirio ar gyfer digwyddiad Hanner Marathon Caerdydd fore Sul, ac mae'r rhybudd tywydd oedd mewn lle, bellach wedi dod i ben.

Dywedodd Trafnidiaeth Cymru bod gwasanaethau trenau rhwng Caerdydd ac Amwythig wedi eu canslo ar ôl i goeden ddisgyn ar y traciau.

Cafodd gwasanaethau trenau rhwng Tywyn a Harlech hefyd eu canslo fore Sadwrn ar ôl i gwch daro pont ym Mermo.

Image

Cafodd taith fferi Stena Adventurer o Ddulyn i Gaergybi ei chanslo fore Sadwrn yn sgil y tywydd garw.

Roedd yr amodau gwael hefyd wedi effeithio ar deithwyr ar y ffyrdd, gyda Phont Hafren ar yr M48 wedi'i chau i'r ddau gyfeiriad.

Dywedodd Cyngor Sir Ynys Môn bod nifer o goed wedi disgyn ar draws ffyrdd ac y bydd y gwaith clirio yn dechrau prynhawn Sadwrn.

Rhybuddion melyn

Roedd y Swyddfa Dywydd wedi cyhoeddi sawl rhybudd melyn am wyntoedd cryfion yng Nghymru dros y penwythnos.

Roedd y rhybudd cyntaf mewn grym am 15.00 ddydd Gwener yn ardaloedd o ogledd a gorllewin Cymru, ac am 00.00 ddydd Sadwrn, daeth ail rybudd am wynt i rym sy'n effeithio ar weddill y wlad, a hynny tan 19.00.

Image

Mae adroddiadau fod y gwyntoedd wedi cyrraedd 85mya mewn rhai mannau.

Mae'r ynni wedi adrodd eu bod yn gwneud popeth o fewn eu gallu i adfer cyflenwadau pŵer i'w holl gwsmeriaid cyn gynted ag y bydd modd.