Mae dyn wedi cael ei gludo i'r ysbyty mewn hofrennydd ar ôl torri ei goesau wrth neidio oddi ar glogwyn yn Eryri.

Roedd y dyn o Ganolbarth Lloegr wedi neidio tua 100 troedfedd gyda'i draed yn gyntaf gan daro silff greigiog ger Llyn Gwynant.

Fe wnaeth y digwyddiad arwain at ymgyrch achub a oedd yn cynnwys hofrenyddion a thimau achub mynydd Dyffryn Ogwen a Llanberis.

Y gred yw bod y dyn, sydd yn ei 40au, wedi camgymryd wyneb craig fel un lle'r oedd wedi neidio degawd nôl.

Pan blymiodd i lawr i'r dŵr, roedd dau berson yn canŵio ar y llyn ac yn gallu ei helpu.

Cafodd ei hedfan i ysbyty yn Stoke-on-Trent oherwydd difrifoldeb ei anafiadau.