Fe agorwyd cwest yn Rhuthun ddydd Llun i farwolaeth cyn hyfforddwr pêl-droed menywod Lerpwl yn ei gartref yng Nghymru.

Cafodd Matthew Beard, 47 oed, ei ddarganfod yn crogi yn ei gartref yn Green Meadows, Penarlâg, yn Sir y Fflint.

Bu farw yn Ysbyty Countess of Chester ar ddydd Sadwrn, 20 Medi.

Dywedodd crwner dwyrain a chanol Gogledd Cymru, John Gittins, fod y farwolaeth oherwydd anaf “dinistriol” i'r ymennydd.

Ychwanegodd mai “marwolaeth annaturiol” oedd hi.

"Yn amlwg bydd angen rhagor o dystiolaeth maes o law," ychwanegodd.

Gohiriwyd y gwrandawiad byr. Nid oedd unrhyw aelod o’r teulu yn bresennol.

‘Allweddol’

Dywedodd Cymdeithas Bêl-droed Lloegr yn dilyn ei farwolaeth: "Rydym yn drist iawn o glywed am farwolaeth Matt Beard.

"Roedd Matt yn rhan allweddol o dyfu gêm y menywod yn Lloegr a bydd pawb yn gweld ei eisiau.

“Ar ôl gyrfa reoli a ddechreuodd yn Millwall Lionesses yn 2008, aeth Matt ymlaen i fod yn gyfrifol am Chelsea, Lerpwl dros ddau gyfnod, West Ham United a Burnley.

“Arweiniodd dimau ddwywaith i Rownd Derfynol Cwpan FA y Merched, yn gyntaf gyda Chelsea yn 2012 ac yna gyda West Ham yn 2019, tra bu’n goruchwylio teitlau WSL yn olynol gyda Lerpwl yn 2013 a 2014.

“Mae ein meddyliau gyda’i deulu a’i ffrindiau yn ystod yr amser anodd hwn.”

Llun gan Katie Chan