Mae'r biliwnydd Elon Musk a'r Tywysog Andrew wedi cael eu henwi mewn dogfennau newydd yn ymwneud â'r troseddwr rhyw Jeffrey Epstein.

Mae'n ymddangos fod y dogfennau sydd wedi eu rhannu ag un o bwyllgorau cyngres yr Unol Daleithiau gan Ystâd Jeffrey Epstein yn dangos fod Musk wedi cael ei wahodd i ynys Epstein ym mis Rhagfyr 2014.

Mae enw'r Tywysog Andrew wedi'i gynnwys ar awyren o New Jersey i Fflorida ym mis Mai 2000.

Mae'r Tywysog Andrew eisoes wedi gwadu ei fod wedi gwneud unrhyw beth o'i le. Mae Mr Musk wedi dweud yn y gorffennol fod Epstein wedi ei wahodd i'r ynys ond ei fod wedi gwrthod. 

Mae un llyfr cyfrifon yn cofnodi dau gyfeiriad am daliadau i ddylino'r corff (massage) ar gyfer person o'r enw 'Andrew' ym mis Chwefror a Mai 2000. 

Er fod cofnodion y Palas, lluniau ac adroddiadau'r wasg o'r cyfnod yn awgrymu fod y Tywysog Andrew wedi teithio i UDA yn y cyfnod hwnnw, nid yw'n glir pwy yw'r 'Andrew' sy'n cael ei gyfeirio ato yn y cofnodion.

Yn ogystal â Musk a'r Tywysog Andrew, mae'r dogfennau hefyd yn cynnwys enwau ffigyrau blaenllaw eraill, gan gynnwys y dyn busnes Peter Thiel, a Steve Bannon, cyn-gynghorydd i Donald Trump.

Ond nid yw'n cael ei awgrymu fod y rhai sydd wedi eu henwi yn y dogfennau yn ymwybodol o'r weithgaredd droseddol honedig y cafodd Epstein ei arestio amdani yn ddiweddarach. 

Cafwyd hyd i Epstein yn farw yn ei gell mewn carchar ym Manhattan, yn yr Unol Daleithiau, ym mis Awst 2019 tra roedd yn aros am ei achos llys ar gyhuddiadau yn ymwneud â throseddau rhyw.