Mae dau achos o’r tafod glas wedi’u canfod yng Nghymru, ddyddiau yn unig wedi i Lywodraeth Cymru lacio cyfyngiadau.

Dyma'r achosion cyntaf i gael eu darganfod eleni.

Dywedodd Llywodraeth Cymru fod seroteip 3 y tafod glas wedi’i nodi ar ddau safle yng Nghymru, un yn Sir Fynwy ac un ym Mhowys.

“Dylai ceidwaid da byw barhau i fod yn wyliadwrus a phrynu da byw o lefydd diogel,” meddai llefarydd.

“Siaradwch â’ch milfeddyg am y clefyd, brechwch yn ei erbyn ac adroddwch achosion amheus i APHA.”

Dywedodd Asiantaeth Iechyd Anifeiliaid a Phlanhigion Llywodraeth y DU (APHA) fod un achos wedi’i gadarnhau ar safle ger Llanandras ym Mhowys, ac un arall ar safle ger Cas-gwent yn Sir Fynwy.

Daw’r achosion hyn ar ôl i Lywodraeth Cymru lacio cyfyngiadau ar symud da byw o Loegr i Gymru ar 21 Medi.

Mae'r rheolau newydd yn golygu y gall anifeiliaid sydd wedi cwblhau cynllun brechu, ac sydd heb ddangos unrhyw arwyddion o salwch, symud o'r parth dan gyfyngiadau yn Lloegr i Gymru heb brawf cyn symud.

Ym mis Medi'r llynedd, cafodd y Tafod Glas seroteip 3 (BTV-3) ei ddarganfod mewn tair dafad a gafodd eu symud i Wynedd o ddwyrain Lloegr.

Y mis canlynol, fe gafodd achos arall ei gofnodi ar fferm ar Ynys Môn, lle cafodd yr haint ei ddarganfod mewn anifail a gafodd ei symud o ddwyrain Lloegr.

Fe gafodd y cyfyngiadau rheini eu codi ym mis Tachwedd y llynedd.

Beth yw tafod glas?

Mae’r tafod glas yn firws yn cael ei ledaenu'n bennaf gan wybedyn bach sy'n brathu.

Mae'n effeithio ar ddefaid, gwartheg, cilgnowyr eraill fel ceirw a geifr, a chamelidau fel lamas ac alpacas.

Mae’n effeithio ar iechyd a chynhyrchiant anifeiliaid. Mewn achosion difrifol, gall achosi erthyliadau a hyd yn oed marwolaeth mewn anifeiliaid heintiedig.

Un o’r symptomau yw lliw glas ar dafodau anifeiliaid oherwydd lefelau isel o ocsigen yn y gwaed.

Nid yw'n effeithio ar bobl na diogelwch bwyd, ond gall achosion arwain at gyfyngiadau ar symud anifeiliaid am gyfnod hir a masnach.