Mae dyn 57 oed wedi ei gyhuddo yn dilyn gwrthdrawiad difrifol ym Mangor nos Fawrth.

Cafodd yr heddlu eu galw i'r gwrthdrawiad, rhwng VW Golf gwyn a Vauxhall Corsa du, ar Ffordd Treborth ar yr A487 am 20:31.

Mae Stephen Mills wedi ei gyhuddo o dri chyhuddiad o achosi anaf difrifol drwy yrru yn beryglus.

Mae'n parhau yn y ddalfa ac fe fydd yn ymddangos o flaen Llys Ynadon Llandudno ddydd Gwener.

Fe gafodd merch 17 oed ei chludo i Ysbyty Gwynedd, ond bellach mae wedi ei chludo gan ambiwlans awyr i ysbyty yn Stoke gydag anafiadau difrifol.

Fe wnaeth pobl eraill oedd yn teithio yn yr un car ddioddef anafiadau difrifol, gan hefyd dderbyn triniaeth feddygol.

Dywedodd y Ditectif Arolygydd Tim Evans o'r Uned Ymchwilio Gwrthdrawiad Difrifol: "Yn gyntaf, mae fy meddyliau gyda'r tri pherson ifanc sydd yn parhau yn yr ysbyty yn dilyn y gwrthdrawiad, a hoffwn ddiolch i'r rhai a ddaeth i helpu.

"Hoffwn ganmol gwaith y gwasanaethau brys yn eu hymateb i'r digwyddiad, y tîm ymchwilio sydd wedi gweithio yn ddiflino, a'n swyddogion arbenigol sydd yn parhau i gynnig cefnogaeth i'r teuluoedd yn ystod y cyfnod ofnadwy o anodd yma.

"Dwi'n ddiolchgar iawn i'r rhai a ddaeth ymlaen yn dilyn ein hapêl, a dwi'n gofyn i unrhyw un sydd â CCTV, neu ddeunydd fideo o Golf VW yn cael ei yrru ym Miwmares, Llanfairpwll, Porthaethwy neu ym Mangor Uchaf rhwng 19:30 a 20:30 ddydd Mawrth i gysylltu â ni."

Mae'r heddlu yn gofyn i unrhyw un â gwybodaeth i gysylltu gan ddefnyddio'r cyfeirnod 25000787692.