Mae dyn 19 oed o Fethesda wedi pledio'n euog i bedwar cyhuddiad sy'n cynnwys achosi anafiadau difrifol i berson arall.

Cafodd Thomas Baker ei arestio yn dilyn digwyddiad ar Stryd Fawr Bethesda ar 18 Awst, lle cafodd car ei ddefnyddio i anafu unigolyn.

Roedd wedi achosi niwed corfforol difrifol gyda bwriad i David Thomas ac fe wnaeth hefyd gyfaddef i ymosodiad cyffredin ar Michael Smith.

Fe ymddangosodd Baker gerbron yr Ustus Timothy Petts yn Llys y Goron Caernarfon fore Llun.

Fe wnaeth Baker, o Glan Ogwen ym Methesda, bledio'n euog i bedwar cyhuddiad, sef anafu yn fwriadol, ymosod ar berson, gyrru'n beryglus a gyrru car Audi A3 tra ei fod wedi ei wahardd rhag gwneud hynny.

Fe fydd Baker yn dychwelyd i'r llys ar ddydd Gwener 17 Hydref ar gyfer ei ddedfrydu.

Ni wnaethpwyd cais am fechniaeth ar ran Baker, ac fe fydd yn parhau dan glo hyd nes ei ddedfrydu.