Mae hediadau wedi cael eu gohirio a'u canslo mewn meysydd awyr gan gynnwys Heathrow ar ôl i ymosodiad seiber honedig dargedu systemau cofrestru teithwyr.

Mae meysydd awyr Heathrow yn Llundain, Brwsel a Berlin i gyd wedi eu heffeithio yn dilyn y "mater technegol" sydd wedi targedu Collins Aerospace, sy'n gweithio i sawl cwmni hedfan mewn sawl maes awyr ledled y byd.

Dywedodd Heathrow y dylai teithwyr wirio eu hediad cyn teithio i'r maes awyr yng ngorllewin Llundain.

Dywedodd llefarydd ar ran y maes awyr: "Mae Collins Aerospace, sy'n darparu systemau cofrestru i sawl cwmni hedfan ar draws sawl maes awyr yn fyd-eang, yn profi problem dechnegol a allai achosi oedi i deithwyr sy'n gadael.

"Er bod y darparwr yn gweithio i ddatrys y broblem yn gyflym, rydym yn cynghori teithwyr i wirio statws eu hediad gyda'u cwmni hedfan cyn teithio.

"Cyrhaeddwch ddim cynharach na thair awr cyn hediad hir neu ddwy awr cyn hediad domestig.

"Mae cydweithwyr ychwanegol ar gael yn yr ardaloedd cofrestru i gynorthwyo a helpu i leihau aflonyddwch. Ymddiheurwn am unrhyw anghyfleustra."