"Mae’r ffigurau uwch ar gyfer treisio yn fy adroddiad blynyddol yn siomedig," meddai. 

"Fodd bynnag, ers y cyfnod sy'n cael ei nodi yn yr adroddiad, mae nifer y troseddau a gafodd eu cofnodi wedi gostwng ac mae’r gyfradd ganfod wedi codi.

"Mae’r cynnydd yma yn y gyfradd ganlyniadau yn gadarnhaol i’w weld, ond mae’n dal yn isel ar y cyfan, a byddaf yn gweithio gyda’r Prif Gwnstabl a’i Phrif Swyddogion i fynd i’r afael â hyn ar ran y cyhoedd."

Fe aeth ymlaen i ddweud bod sicrhau diogelwch a lles pobl yn "brif flaenoriaeth", gan annog dioddefwyr i adrodd achosion o gamymddwyn.

"Rwyf wedi gwneud mynd i’r afael â thrais yn erbyn menywod a merched yn amcan allweddol i’r heddlu fel rhan o gynllun i leihau troseddu ar draws ein rhanbarth," meddai.

"Mae hyn yn golygu fy mod am wneud gogledd Cymru yn fwy diogel i fenywod a merched ac atal a lleihau trais trwy sicrhau eu diogelwch trwy ymyrraeth, addysg a chefnogaeth. 

"Fel rhan o hyn, rwyf hefyd yn comisiynu gwasanaethau sy’n darparu gofal i ddioddefwyr drwy gydol y broses o adrodd am ddigwyddiad, o’r ymateb cychwynnol mewn canolfan atgyfeirio ymosodiad rhywiol, i ofal ôl-weithredol a chefnogaeth gan sefydliadau sy’n cynnig cwnsela a therapi."