Mae negeseuon testun llawn rhegfeydd anfonwyd yn honedig gan gyn uwch swyddog S4C, sydd yn ceisio hawlio dros £550,000 gan y darlledwr, wedi dod i'r amlwg mewn dogfennaeth o'r Uchel Lys.

Mae cyfres o ddogfennau hirfaith wedi eu rhannu gyda rhaglen Newyddion S4C yn ymwneud â hawliad gan gyn Brif Swyddog Cynnwys S4C, Llinos Griffin-Williams, sydd yn dwyn achos yn erbyn ei chyn-gyflogwr S4C a'r cyn Gadeirydd Rhodri Williams.

Cafodd Ms Griffin-Williams ei diswyddo wedi honiadau iddi ymosod yn eiriol ar gyn-fewnwr Cymru, Mike Phillips, tra'n feddw wedi gêm Cymru yn erbyn Georgia yng Nghwpan Rygbi'r Byd yn Nantes.

Mae Ms Griffin-Williams yn gwadu camymddwyn difrifol ac yn ceisio hawlio iawndal ar sail diogelu data. Mae hi hefyd yn cyhuddo Rhodri Williams o gamweithredu mewn swydd gyhoeddus.

Mae S4C a Rhodri Williams yn gwadu'r cyhuddiadau yn eu herbyn, ac yn dweud i Ms Griffin-Williams gael ei diswyddo am gamymddwyn difrifol.

Yn ôl dogfennau sydd wedi eu hanfon at yr Uchel Lys ar ran y diffynyddion, fe wnaeth tri unigolyn sydd yn gweithio o fewn y byd darlledu Cymreig gysylltu â Rhodri Williams i gwyno am ymddygiad honedig Ms Griffin-Williams yn Nantes: Cadeirydd Gweithredol cwmni Tinopolis, Ron Jones; Cyfarwyddwr Gweithredol Whisper Cymru, Carys Owens, sydd yn wraig i gyn-gapten Cymru Ken; a thrydydd unigolyn oedd yn gweithio i S4C ar y pryd dydyn ni ddim yn ei enwi.

Mae dogfennau ar ran S4C a Rhodri Williams yn dyfynnu negeseuon testun honedig llawn rhegfeydd ac yn y Saesneg anfonwyd gan Ms Griffin-Williams at Carys Owen:

“Sian is f***ing fuming with you.”

“Get the f***in (sic.) talent here.”

“Nobody cares a f**k about the crew, you just need to bring the talent here. She wants the talent.”

'Anwiredd'

Yn ôl dogfennau ar ran Ms Griffin-Williams, mae cynnwys y negeseuon wedi cael ei or-liwio a dodden nhw ddim yn fygythiol nac yn sarhaus.

Mae honiad iddi hefyd ddweud wrth un o uwch-gynhyrchwyr Whisper Cymru na fyddai'r cwmni yn cael gwaith pellach gan S4C am y 12 mis nesaf.

Dweud mae'r dogfennau ar ran Ms Griffin-Williams bod hynny yn "anwiredd".

Mae Ms Griffin-Williams yn ceisio hawlio £565,000 am golledion ariannol a symiau sydd heb eu pennu eto am niwed i'w henw da a niwed i'w hiechyd a'i theimladau.

Mae’r dogfennau yn enwi Gwyn Loader o raglen Newyddion S4C ynghyd â Martin Shipton o Nation.Cymru fel newyddiadurwyr sydd wedi adrodd ar y stori.

Dywedodd S4C na fyddai'n addas iddyn nhw wneud sylw ar achos cyfreithiol cyfredol. Doedd Rhodri Williams ddim am ychwanegu at yr hyn sydd yn y ddogfennaeth ar ei ran yn y llys.

Mae'r achos yn yr Uchel Lys yn parhau.