Mae'r heddlu wedi arestio dyn o Gaerdydd ar amheuaeth o sbecian ar ôl ei weld yn tynnu lluniau o fenywod yng nghanol dinas Lerpwl yn oriau mân fore Iau.

Sylwodd swyddogion ar ddyn yn ymddwyn yn amheus wrth iddo gerdded yn agos at fenywod a defnyddio ei ffôn symudol yn gudd i dynnu lluniau o dan eu sgertiau.

Cafodd y dyn ei arestio gan swyddogion oedd ar batrôl ar Stryd y Fflyd ger Sgwâr y Cyngerdd yn Lerpwl am 01:30.

Cafodd dyn 38 oed o Gaerdydd ei arestio ar amheuaeth o sbecian ('voyeurism'). 

Mae'n parhau yn y ddalfa.

'Annerbyniol'

Dywedodd y Prif Dditectif Arolygydd Stephen Ball: “Mae'r ymddygiad hwn a welodd ein swyddogion yn gwbl annerbyniol ac ni fydd yn cael ei oddef. 

"Dylai menywod allu mwynhau noson allan heb ofni cael lluniau wedi eu tynnu ohonynt mewn ffordd mor anweddus heb eu caniatâd.

“Mae Lerpwl wedi cael statws Baner Borffor am y 15 mlynedd diwethaf ac mae'n un o'r dinasoedd mwyaf diogel yn y DU. 

"Gwyddom fod pobl yn teithio o bell ac agos i fwynhau'r hyn sydd ar gael yma ac rydym am i hynny barhau."

Ychwanegodd: “Mae gennym yr ymgyrch ‘Strydoedd Diogelach’, sydd hefyd yn canolbwyntio ar atal trais rhywiol yn yr economi nos, rydym yn rheolaidd yn nodi ac yn mynd ar drywydd troseddwyr sy’n peri risg o niwed i fenywod a merched yn rhagweithiol.

"Byddwn yn parhau i wrando ar leisiau menywod a merched i ddeall beth all plismona ei wneud i’w cadw’n ddiogel a byddwn yn rhoi mesurau effeithiol ar waith i ymateb i’r ofnau a’r pryderon hynny."