Fe fydd mwy na dwy filiwn o gartrefi yn osgoi troi eu gwres canolog ymlaen dros y gaeaf a hynny’n bennaf oherwydd y cynnydd mewn prisiau biliau ynni sy'n codi'n sydyn, yn ôl arolwg.

Mae hynny’n gynnydd o 22% ar y llynedd, yn ôl arolwg gan Opinium a holodd 2,000 o bobl ar ran cwmni Uswitch.

Roedd mwy na thri chwarter o gartrefi (77%) yn poeni am fod yn oer dros y gaeaf hwn oherwydd prisiau ynni uchel, gydag un o bob chwech (16%) yn "bryderus iawn".

Un a ddywedodd nad oedd am droi ei gwres canolog ymlaen eleni oedd Raquel Griffiths (uchod), 56 oed, o Lantrisant, a ddywedodd y byddai yn gwresogi un ystafell ar y tro yn unig.

Dywedodd ei bod hi wedi prynu pum gwresogydd 1.2kW i'w defnyddio mewn ystafelloedd unigol pan fo angen er mwyn gostwng ei bil gwresogi "yn sylweddol”.

“Dim ond yr ystafell rwy'n ei defnyddio mewn gwirionedd rwy'n ei gwresogi,” meddai.

“Rydw i ar fy mhen fy hun mewn tŷ pedair ystafell wely, a does dim angen gwresogi dros 60% o'r ystafelloedd.

"Rydw i wedi sylwi bod fy miliau ynni wedi gostwng, yn enwedig o fis Chwefror a mis Mawrth y llynedd pan ddechreuais i ddefnyddio'r gwresogyddion hyn."

Image

Y rhai sy'n byw ar eu pennau eu hunain yw'r rhai mwyaf tebygol o osgoi defnyddio'r gwres canolog, yn ôl arolwg Uswitch.

Roedd un o bob 10 o breswylwyr oedd yn byw ar eu pennau eu hunain yn bwriadu dod o hyd i ffyrdd eraill i gadw'n gynnes.

Roedd un o bob 20 o gartrefi â phlant iau (5%) hefyd yn dweud na fyddant yn troi'r gwres ymlaen.

Bydd cartrefi yn troi eu gwres ymlaen ar Hydref 1af eleni ar gyfartaledd - pum niwrnod yn gynharach na Hydref 6ed y llynedd.

Fodd bynnag, hyd yn oed yng nghanol mis Medi, mae pedwar miliwn o bobl eisoes wedi troi eu gwres ymlaen, yn ôl yr arolwg.

Dywedodd Will Owen, llefarydd ynni yn Uswitch: “Mae'n bryderus gweld bod nifer yr aelwydydd sy'n bwriadu mynd trwy'r gaeaf heb wres wedi cynyddu o un rhan o bump eleni, gyda phreswylwyr unigol yn fwyaf tebygol o wneud hynny.

“Gall treulio'r gaeaf mewn cartref oer fod yn ddrwg i'ch iechyd, ac rydyn ni’n cynghori pobl i osod eu thermostatau rhwng 18°C ​​a 21°C hyd yn oed wrth geisio arbed arian.

“Os ydych chi'n poeni am dalu'ch bil ynni'r gaeaf hwn, peidiwch â dioddef ar eich pen eich hun. Cysylltwch â'ch cyflenwr ynni, a allai gynnig cyngor a chefnogaeth.”

Fe wnaeth Opinium holi 2,000 o drigolion y DU rhwng Medi 5 a 9.