Mae Arlywydd UDA Donald Trump wedi dweud ei fod wedi "anghytuno" gyda Phrif Weinidog y DU Syr Keir Starmer am ei fwriad i gydnabod gwladwriaeth Balesteinaidd.

Daw hyn wedi adroddiadau y byddai Syr Keir Starmer yn cydnabod bodolaeth gwladwriaeth Balesteinaidd dros y penwythnos ar ôl i Donald Trump orffen ei ymweliad gwladol â'r DU.

Fe wnaeth Syr Keir fynnu nad oedd yn oedi ei gyhoeddiad ar gydnabod gwladwriaeth Balesteinaidd tan ar ôl i Mr Trump adael y DU. 

Mae disgwyl i'r Prif Weinidog gydnabod gwladwriaeth Balesteinaidd cyn cynulliad cyffredinol y Cenhedloedd Unedig yn Efrog Newydd y mis hwn, os nad yw Israel yn sicrhau cyfres o amodau i wella y sefyllfa ddyngarol yn Gaza.

Mae cydnabyddiaeth Brydeinig fwy neu lai yn sicr, gydag Israel eisoes wedi dweud ei bod yn gwrthwynebu amodau Syr Keir, gan gynnwys cytuno i gadoediad, a derbyn bod angen dwy wladwriaeth yno ac ar y Llain Orllewinol.

Mae UDA o dan Mr Trump yn parhau i wrthwynebu'r syniad o gydnabod gwladwriaeth Balesteinaidd, ac mae hefyd wedi gwrthod rhoi fisas i swyddogion Palesteinaidd ar gyfer cynulliad cyffredinol y Cenhedloedd Unedig.

"Mae gen i anghytundeb gyda'r Prif Weinidog ar y mater hwn, un o’n ychydig anghytundebau mewn gwirionedd," meddai Mr Trump wrth newyddiadurwyr yn ystod cynhadledd i'r wasg yn Chequers ddydd Iau, pan ofynwyd iddo am fwriad y DU i gydnabod gwladwriaeth Balesteinaidd.

'Uchelgeisiol'

Daw hyn wedi i Donald Trump roi teyrnged i berthynas yr Unol Daleithiau a’r Deyrnas Unedig mewn gwledd gyda’r Brenin Charles III ddydd Mercher.

Roedd y gwesteion yn cynnwys penaethiaid cwmnïau technoleg mawr yr Unol Daleithiau, gan gynnwys Tim Cook o Apple a Sam Altman o OpenAI.

Dywedodd Mr Trump wrth y gwesteion a oedd wedi ymgynnull yng Nghastell Windsor: “O safbwynt Americanaidd, nid yw’r gair ‘arbennig’ yn gwneud cyfiawnder iddo.”

Wrth ymateb i’r buddsoddiad dywedodd y Prif Weinidog eu bod nhw’n “llunio’r dyfodol ar gyfer cenedlaethau i ddod”.

“Mae’r buddsoddiadau hyn yn dangos cryfder economaidd Prydain ac yn arwydd bod ein gwlad yn agored, yn uchelgeisiol ac yn barod i arwain,” meddai.

“Roeddwn i wedi addo swyddi, twf a chyfle i bobl sy’n gweithio, a dyna’n union yr hyn y mae’r ymweliad gwladol hwn yn ei gyflawni.”

Llun: Phil Noble / PA.