Mae yna bryderon am gynnal rhagor o gigiau ar gaeau chwarae yng Nghaerdydd wrth i gyfres newydd o sioeau gael eu cyhoeddi ar gyfer y flwyddyn nesaf.

Roedd artistiaid gan gynnwys Stevie Wonder, Alanis Morissette, Noah Kahan, a Slayer wedi perfformio fel rhan o gyfres Blackweir Live yn y brifddinas ym misoedd Mehefin a Gorffennaf eleni.

Ddydd Llun fe gyhoeddodd Cyngor Caerdydd gyfres newydd o gigiau ar y caeau chwarae gan ddweud eu bod nhw wedi bod yn llwyddiant ac wedi dod ag arian ychwanegol i mewn.

Bydd Lewis Capaldi (uchod) ymhlith y perfformwyr yn Blackweir Live yn 2026.

Ond mae grŵp trigolion lleol Cyfeillion Parc Bute wedi mynegi pryderon am draffig, sŵn, llygredd a mynediad y cyhoedd at y parc.

“Er bod Cyngor Caerdydd a threfnwyr digwyddiadau yn honni bod £35m o enillion economaidd a manteision diwylliannol, mae’r manteision hyn yng nghysgod yr effeithiau ar yr amgylchedd, trigolion a seilwaith,” medden nhw.

“Mae’r model digwyddiadau hwn wedi methu â chyd-fynd ag egwyddorion cynaliadwyedd craidd ac mae hyder y gymuned yng ngallu Cyngor Caerdydd i reoli digwyddiadau mewn parciau cyhoeddus wedi’i erydu’n ddifrifol.”

Roedd eu pryderon yn cynnwys torri coed er mwyn creu mynediad i’r safle a dros 100 o gwynion i’r cyngor am y sŵn, medden nhw.

Image

Dywedodd Cyngor Caerdydd fod 49% o’r rheini oedd wedi mynd i Blackweir Live wedi teithio o'r tu allan i Gymru a bod 2.6% wedi dod o'r tu allan i'r DU.

Roedd y digwyddiadau wedi cyflogi 3,118 o bobl a bod 95% o'r swyddi hynny mewn busnesau yng Nghymru, medden nhw.

Dywedodd arweinydd Cyngor Caerdydd, y Cynghorydd Huw Thomas, mewn cyfweliad eleni y bydd incwm o Blackweir Live yn helpu'r cyngor i osgoi penderfyniadau cyllidebol anodd yn y dyfodol.

Roedd ymateb cadarnhaol i’r gigiau hefyd ymysg pobl busnes yng Nghaerdydd.

Dywedodd rheolwr cyffredinol tafarn y Blue Bell yn Stryd Santes Fair, Nick Newman, fod Blackweir Live yn “wych” o safbwynt busnes ac nad oedd yn adnabod unrhyw fusnes yng nghanol y ddinas nad oedd yn croesawu’r gigau.

“Dyma sydd raid i ni ei wneud fel prifddinas i hyrwyddo ein hunain,” meddai Mr Newman, sydd hefyd yn gadeirydd Fforwm Trwyddedigion Caerdydd ac yn aelod o fwrdd FOR Cardiff.

“I dafarndai, bariau a chlybiau, y mwyaf o ddigwyddiadau sydd gennym yng nghanol y ddinas, y gorau.

“Wrth gwrs, mae Caerdydd yn ddinas y mae pobl yn teithio iddi ac mae’r enw da hwnnw’n tyfu, byddwn i’n dweud, o flwyddyn i flwyddyn.

“Felly, roeddem yn gefnogol i ddigwyddiadau Blackweir ochr yn ochr â digwyddiadau’r Castell a’r digwyddiadau sydd gennym yn stadiwm [Principality] drwy gydol y flwyddyn.”

Image

Roedd yna bryderon am effaith y gigiau ar gaeau chwarae ond dywedodd Syed Abbas, cadeirydd Clwb Criced y Bay Dragons nad oedd “y dirywiad disgwyliedig heb ddigwydd”.

“Doedd gennym ni ddim unrhyw broblem gyda Blackweir Live. Roeddent yn barod iawn i helpu ac fe wnaethon nhw gadw at eu contract.

“O ran dyfodol criced yn Blackweir neu o leiaf i Bay Dragons os oes rhaid i Blackweir Live fodoli yna mae angen i ni ddysgu cydfodoli ond hoffem ni gael rhywfaint o gefnogaeth gan y cyngor a Blackweir Live.

“Os ydym yn gorfod dioddef rhywfaint o ddifrod efallai y bydd modd lliniaru’r risgiau drwy fuddsoddi rhywfaint o gyllid.”

Ond dywedodd cadeirydd Cynghrair Criced Canol-wythnos Caerdydd (CMCL), Khawaja Ali Ajmal, nad oedd wedi cael gwybod am benderfyniad Cyngor Caerdydd i fwrw ymlaen â Blackweir Live yn 2026.

Dywedodd: “Ymddengys bod y cyngor yn manteisio’n ariannol yn llawn ar y digwyddiad heb unrhyw ail-fuddsoddi gweladwy mewn criced, boed hynny drwy ddatblygu rhagor o gaeau criced, gwella cyfleusterau, neu gefnogi’r gamp yn lleol mewn unrhyw ffordd.

“Mae’n siomedig nad oes unrhyw ddeialog gyda ni fel rhanddeiliaid allweddol yn yr ardal.”