Mae dau ddyn wedi marw ar ôl gwrthdrawiad ffordd yn Sir Benfro yn ystod oriau mân fore Sul.

Dywedodd Heddlu Dyfed-Powys eu bod wedi cael eu galw i ffordd yr A40 rhwng Hwlffordd a Threfgarn toc wedi 03.10 ddydd Sul yn dilyn adroddiad am wrthdrawiad un cerbyd oedd yn ymwneud â Volkswagon Polo arian.

Bu farw'r ddau ddyn oedd yn y cerbyd hwnnw yn y fan a'r lle.

Mae eu perthnasau agosaf wedi cael gwybod ac yn cael eu cefnogi gan swyddogion.

Cafodd y ffordd ei chau rhwng Spittal a Hwlffordd yn dilyn y gwrthdrawiad, gan gael ei hailagor am tua 16.45. 

Mae'r heddlu bellach yn apelio ar unrhyw un a allai fod wedi gweld y digwyddiad, neu sydd â lluniau camera dangosfwrdd, i gysylltu â nhw drwy ddyfynnu'r cyfeirnod 25*760810.