Mae ymgynghoriad 12 wythnos wedi dechrau ar gynlluniau i greu Parc Cenedlaethol newydd a fyddai yn ymestyn ar draws gogledd-ddwyrain Cymru a Phowys.

Fe fyddai ‘Parc Cenedlaethol Glyndŵr’ yn ymestyn o Brestatyn ar yr arfordir, ar draws Sir Ddinbych, trwy Sir y Fflint, Wrecsam ac i lawr i ogledd Powys.

Mae rhan fawr o’r parc cenedlaethol newydd o fewn Powys wedi ei ddileu ers yr ymgynghoriad diwethaf.

“Mae'r ffin wedi'i mireinio i ddal ardal gydlynol o harddwch naturiol yn well gan ganolbwyntio ar yr ucheldiroedd, y dyffrynnoedd sy'n croestorri a'r ymyl arfordirol,” meddai Cyfoeth Naturiol Cymru.

Mae modd ymateb i’r ymgynghoriad fan hyn.

Image

Dywedodd Ash Pearce, Rheolwr y Rhaglen: “Mae hwn yn gyfle unwaith mewn cenhedlaeth i amddiffyn natur, cefnogi cymunedau, a llunio dyfodol gwell i’r rhan hyfryd hon o Gymru. 

"Rydyn ni’n gwybod y gall newid fod yn anodd, ond gyda’r dull cywir, gallai Parc Cenedlaethol newydd ddod â manteision go iawn i bobl, bywyd gwyllt a’r economi leol.”

Mae CNC wedi bod yn gwerthuso’r achos dros Barc Cenedlaethol newydd dros y ddwy flynedd diwethaf, medden nhw.

Fe wnaeth y bwrdd benderfynu ar 16 Gorffennaf 2025 i fwrw ymlaen ag Ymgynghoriad Statudol ar y cynnig.

Roedd ymarfer ymgysylltu cyhoeddus cychwynnol yn 2023 wedi canfod fod 51% o'r rhai a holwyd o blaid parc newydd, gyda 42% yn erbyn.

Yr enw Glyndŵr oedd yr opsiwn mwyaf poblogaidd yn yr ymgynghoriad cyhoeddus a ddilynodd yn 2024.