Mae Llenyddiaeth Cymru wedi cyhoeddi enw 19eg Bardd Plant Cymru.

Fe gyhoeddwyd ddydd Mercher fod Siôn Tomos Owen wedi dechrau yn y rôl yn swyddogol ddechrau Medi.

Mae Siôn yn awdur, bardd, artist a chyflwynydd dwyieithog sy'n wreiddiol o Dreorci yn Rhondda Fawr, ac mae'n gweithio fel artist llawrydd creadigol yn darlunio, paentio murluniau a chynnal gweithdai creadigol.

Roedd yn un o gyflwynwr cyfresi Cynefin a Pobol y Rhondda ar S4C, yn ogystal roedd hefyd yn gyfrannwr comedi i raglenni Y Tŷ Rygbi, Jonathan ac Academi Gomedi.  

Cyrhaeddodd ei gasgliad gyntaf o farddoniaeth, Pethau Sy’n Digwydd (gan gyhoeddiadau Barddas) restr fer Llyfr y Flwyddyn 2025, a’i gyhoeddiad diweddaraf yw nofel i blant o’r enw Gerwyn Gwrthod a’r Llyfr Does Neb yn Cael ei Ddarllen.  

Mae wedi ‘sgwennu a darlunio nifer o lyfrau i blant a dysgwyr Cymraeg, ac mae ei farddoniaeth a’i straeon ar gwricwlwm newydd TGAU Cymraeg a Chymraeg ail iaith.

Mewn ymateb i'w benodiad, dywedodd Siôn: "Fel Bardd Plant Cymru dwi am fagu’r creadigrwydd sydd ym mhob plentyn i greu, creu cerddi, straeon neu ddarluniadau, y doniol a’r dwys, ac i ddefnyddio’r rhain i feithrin y diddordeb mewn darllen wnaeth gydio ynof fi pan roedden i’r un oedran.”