Mae'r heddlu wedi arestio nifer o brotestwyr oedd wedi ymgynnull o flaen Senedd San Steffan yn Llundain i alw ar y llywodraeth i godi’r gwaharddiad ar fudiad Palestine Action.

Roedd Heddlu’r Met wedi dweud y byddai unrhyw un oedd yn rhan o’r brotest yn San Steffan yn gweithredu’n anghyfreithlon a gallai wynebu gael ei arestio.

Wrth i Big Ben daro 13.00 dechreuodd y protestwyr ysgrifennu negeseuon yn cefnogi Palestine Action ar arwyddion.

Dechreuodd yr heddlu arestio'r protestwyr a'u symud un wrth un i ogledd-orllewin y sgwâr.

Roedd y trefnwyr yn disgwyl i tua 1,000 o bobl fod yn rhan o’r brotest.

Dywedodd Franco Ferrer, 69, o Lanberis yng ngogledd Cymru, fod yr heddlu wedi bod yn tynnu lluniau ohono ers iddo gyrraedd.

Roedd yn gwisgo crys-t ‘Plasticine Action’.

“Mae’r crys-t yn ffordd effeithiol o gyfleu’r neges heb risgio cael fy arestio,” meddai.

“Wna i ddim ysgrifennu arwydd oherwydd dydw i ddim yn credu bod gen i’r dewrder i wneud hynny.

“Rydw i wedi dod i gefnogi’r weithred oherwydd bod y Llywodraeth yn gwahardd grŵp protest trwy ddefnyddio deddfau terfysgaeth mewn modd gwarthus. 

“Mae’n tawelu rhyddid barn.”

Image

Roedd Mike Higgins, 62, sy'n ddall ac yn defnyddio cadair olwyn, wedi dychwelyd i brotestio ar ôl cael ei arestio mewn protest flaenorol.

 “Pa ddewis sydd gen i?” gofynnodd.

“Ydw i'n derfysgwr? Dyna jôc y peth.

“Rydw i eisoes wedi cael fy arestio o dan y Ddeddf Terfysgaeth ac rwy'n credu y byddaf eto heddiw.”

Image

'Anghyfreithlon'

Dywedodd Dirprwy Gomisiynydd Cynorthwyol Scotland Yard, Ade Adelekan: “Mae Palestine Action yn grŵp sydd wedi’i wahardd gan Lywodraeth y DU.

“Mae’n drosedd bod yn aelod ohono neu fynegi cefnogaeth iddo.

“Mae’r rhai sy’n cymryd rhan yn y brotest hwn ac mewn protestiadau blaenorol o’r fath yn gwneud hynny gan wybod bod eu gweithredoedd yn anghyfreithlon.

“Os byddwch chi’n dangos cefnogaeth i Palestine Action – trosedd o dan y Ddeddf Terfysgaeth – byddwch chi’n cael eich arestio.

“Mae gennym ni nifer y swyddogion, y capasiti a’r holl adnoddau eraill i brosesu cymaint o bobl ag sydd eu hangen.”

Rhagor i ddilyn...

Prif Lun: James Manning / PA.