Mae Cyfoeth Naturiol Cymru wedi cyhoeddi sychder yng ngogledd Cymru gan ddweud bod rhai afonydd dan eu lefelau isaf ar gofnod.

Er gwaetha’r glaw dros y dyddiau diwethaf, dywedodd CNC ddydd Gwener bod lefelau penodol wedi cael eu cyrraedd i symud gogledd Cymru i statws sychder.

Daw hyn wedi iddyn nhw ddatgan sychder yn ne-ddwyrain Cymru yn gynharach y mis hwn.

“Yng ngogledd Cymru, mae mwy o adroddiadau yn cael eu derbyn am nentydd sych a physgod yn cael eu canfod mewn trafferthion,” meddai llefarydd ar ran Cyfoeth Naturiol Cymru.

“Effeithiodd tân gwyllt difrifol ar Warchodfa Natur Genedlaethol Niwbwrch dros benwythnos gŵyl y banc, gan arwain at gau’r safle am gyfnod.”

Rhannwyd y penderfyniad i symud i statws sychder gyda chyfarfod Grŵp Cyswllt Sychder Llywodraeth Cymru fore dydd Gwener, meddai llefarydd.

Dywedodd Ben Wilson, Prif Gynghorydd, o Gyfoeth Naturiol Cymru y bydd yn cymryd “misoedd lawer” a “glaw mwy cyson” i’r amgylchedd adfer yn llawn.

"Y cyfnod o chwe mis rhwng mis Chwefror a mis Gorffennaf oedd y sychaf ers sychder 1976, ac mae wedi rhoi pwysau eithafol ar ein hafonydd, dyfroedd daear, amaethyddiaeth a bywyd gwyllt,” meddai. 

“Mewn rhai ardaloedd, mae hyn wedi achosi i lifoedd afonydd a lefelau dŵr daear ostwng o dan y lefelau isaf hanesyddol.

"Wrth i ni fynd i mewn i'r Hydref, rydym yn parhau i gadw llygad agos ar ragolygon tywydd, llif afonydd a lefelau dŵr daear, yn ogystal ag ymateb i adroddiadau o ddigwyddiadau amgylcheddol a achoswyd gan y sychder. 

“Rydym yn parhau i fod mewn cysylltiad agos â Llywodraeth Cymru, cwmnïau dŵr a phartneriaid eraill i roi darlun llawn o amodau ledled y wlad."

Hyd yn hyn eleni mae Cymru wedi derbyn 555mm o law (Ionawr i Orffennaf 2025), sydd bron mor sych â'r amodau yn 2022, lle cyhoeddwyd statws sychder ar Gymru gyfan erbyn mis Medi.

O ddydd Mawrth, 26 Awst, roedd Cymru wedi cael 22.43% o’r glawiad misol cyfartalog yn unig.

Ychwanegodd Ben Wilson: "Wrth i newid yn yr hinsawdd gyflymu, mae disgwyl i hafau yn y DU ddod yn sychach, a bydd digwyddiadau tywydd eithafol yn dod yn fwy aml a dwys.”