Mae dau o blant wedi cael eu lladd ac mae 17 o bobl eraill wedi’u hanafu yn dilyn saethu mewn ysgol yn Minneapolis, yn ôl yr heddlu.

Dywedodd Prif Swyddog Heddlu Minneapolis, Brian O'Hara, fod swyddogion wedi eu galw i Ysgol Gatholig y Cyfarchiad yn dilyn adroddiad o saethu yno.

Roedd dyn gyda gwn wedi dechrau saethu drwy ffenestri'r eglwys tuag at blant oedd yng nghanol gwasanaeth yr offeren fore Mercher, meddai.

"Fe darodd blant ac addolwyr y tu mewn i'r adeilad," meddai.

"Roedd y saethwr wedi'i arfogi â reiffl, gwn saethu a phistol. 

"Roedd hon yn weithred dreisgar fwriadol."

Mae'r person sy'n cael ei amau o fod yn gyfrifol am y saethu wedi cael ei adnabod fel Robin Westman o Minneapolis, meddai uwch swyddogion gorfodi'r gyfraith wrth wasanaeth newyddion NBC News yn yr Unol Daleithiau.

Dywedodd Mr O'Hara yn gynharach fod yr heddlu’n credu bod y dyn yn ei "ugeiniau cynnar" ac wedi gweithredu ar ei ben ei hun.

Ychwanegodd ei fod wedi marw a bod yr heddlu’n ceisio dod o hyd i gymhelliad am y saethu.

Cafodd dau o blant, wyth a 10 oed, eu lladd yn dilyn y saethu ac mae 17 o bobl eraill wedi'u hanafu.

Mae 14 o'r rhai gafodd eu hanafu'n blant, gyda dau ohonyn nhw mewn cyflwr difrifol.

Llun: Reuters