Mae Gwasanaeth Tân ac Achub Gogledd Cymru wedi rheoli tân mawr ar Fynydd Bodafon ym Môn dros nos. 

Mewn datganiad fore Sadwrn, dywedodd y gwasanaeth fod chwe injan a phedwar cerbyd tân gwyllt wedi bod bresennol fore Sadwrn.

"Mae ffyrdd cyfagos yn parhau ar gau i sicrhau fod y llwybrau yn glir i'r gwasanaethau brys," meddai'r datganiad. 

Fe wnaeth y gwasanaeth hefyd yn annog pobl i aros i ffwrdd o'r ardal tra mae criwiau yn parhau i ddelio â'r tân, a chynghori trigolion lleol i gau ffenestri a drysau. 

Doedd dim sôn fod unrhyw un wedi cael ei anafu yn y digwyddiad na bod y tân wedi cyrraedd tai cyfagos.

Ar y gwaethaf, roedd yn ymestyn 1,50o o fetrau sgwar.

Mewn datganiad nos Wener, fe ddywedodd y gwasanaeth fod nifer o bobl wedi troi fyny yn yr ardal nos Wener a bod cerbydau'n rhwystro'r llwybrau i'r gwasanaethau brys. 

Ychwanegodd y datganiad eu bod yn annog y cyhoedd i gadw draw o'r ardal a pheidio parcio ar y ffyrdd ger y digwyddiad er mwyn caniatáu i'r criwiau barhau i ddelio â'r tân.

Dywedodd y gwasanaeth tân eu bod yn parhau i dderbyn llawer o alwadau am y digwyddiad, gan annog pobl i beidio â ffonio 999 i roi gwybod am y digwyddiad eto gan eu bod eisoes yn bresennol ac yn ymwybodol.

Llun: Mark Denton