Mae dyn wedi'i arestio ar amheuaeth o achosi anaf difrifol drwy yrru'n beryglus yn Sir Gâr.

Cafodd yr heddlu eu galw i ardal Manordeilo tua 01.45 dydd Sul yn dilyn adroddiad am wrthdrawiad difrifol ar ffordd yr A40.

Roedd y gwrthdrawiad yn cynnwys Mitsubishi L200 du a Skoda Fabia glas.

Cafodd dyn ei gludo i'r ysbyty gydag anafiadau difrifol ac mae'n parhau i gael triniaeth yno.

Cafodd dyn 17 oed ei arestio ar amheuaeth o achosi anaf difrifol drwy yrru'n beryglus a gyrru dros y terfyn cyflymder.

Dywedodd Heddlu Dyfed-Powys ei fod bellach wedi cael ei ryddhau dan ymchwiliad.

Cafodd y ffordd ei chau yn dilyn y gwrthdrawiad ac fe gafodd ei hailagor am tua 17.20 ddydd Sul.

Apêl am wybodaeth

Mae'r llu yn apelio ar unrhyw un a oedd yn teithio ar yr A40 ar adeg y digwyddiad, gan gynnwys gyrwyr â chamera dashcam, i gysylltu â nhw.

Yn benodol mae swyddogion yn dymuno siarad â gyrrwr Peugeot glas a oedd yn gyrru o flaen y Mitsubishi.

Dylai unrhyw un sydd â gwybodaeth gysylltu gan ddyfynnu'r cyfeirnod 25*680344.