Mae Arlywydd America Donald Trump wedi dweud y gallai Volodomyr Zelensky "ddod â'r rhyfel yn Wcráin i ben bron ar unwaith" ar drothwy cyfarfod yn y Tŷ Gwyn ddydd Llun.

Fe fydd Syr Keir Starmer a nifer o arweinwyr eraill gwledydd Ewrop yn ymuno ag Arlywydd Wcráin wrth iddo gyfarfod â'r Arlywydd Trump yn y Tŷ Gwyn yn hwyrach.

Roedd Llywydd y Comisiwn Ewropeaidd, Ursula Von der Leyen, Canghellor yr Almaen, Friedrich Merz, Arlywydd Ffrainc, Emmanuel Macron, Arlywydd y Ffindir, Alexander Stubb, Prif Weinidog yr Eidal, Giorgia Melon ac Ysgrifennydd Cyffredinol Nato, Mark Rutte ymhlith y cyntaf i gadarnhau y byddan nhw'n ymuno â Mr Zelensky yn Washington DC.

Ychydig oriau cyn i'r cyfarfod gychwyn, mae Donald Trump wedi dweud y gallai Zelensky ddod a'r rhyfela yn Wcráin i ben.

Mewn neges ar gyfrwng Truth Social, dywedodd Trump: "Gall Arlywydd Zelensky o Wcráin ddod â'r rhyfel gyda Rwsia i ben bron ar unwaith, os yw am wneud hynny, neu fe allai barhau i ymladd."

Ychwanegodd "na fydd Wcráin yn ymuno â NATO" a "na fydd modd adennill Crimea", sydd wedi ei feddiannu gan Rwsia ers 2014.

Bydd y cyfarfod yn y Tŷ Gwyn ddydd Llun yn cael ei gynnal wedi i rai o arweinwyr Ewrop gynnal cyfarfod drwy gyfrwng fideo brynhawn Sul.   

Roedd Prif Weinidog y DU ac arweinwyr Ffrainc a'r Almaen yn y cyfarfod hwnnw yn ogystal â Llywydd y Comisiwn Ewropeaidd Ursula Von der Leyen.

Wedi'r cyfarfod, dywedodd yr Arlywydd Macron o Ffrainc bod y grwp wedi trafod am ychydig mwy na dwy awr, gan ystyried beth fydd eu blaenoriaethau wrth iddyn nhw gynnal trafodaethau gyda'r Arlywydd Trump ddydd Llun. 

Dywedodd llefarydd ar ran Downing Street fod yr arweinwyr wedi datgan unwaith yn rhagor eu cefnogaeth i Wcráin, a'u bod yn canmol awydd yr Arlywydd Zelensky am heddwch parhaol.  

Mae Llywydd y Comisiwn Ewropeaidd Ursula Von der Leyen wedi pwysleisio bod angen i unrhyw gytundeb heddwch gynnig sicrwydd diogelwch i Wcráin ac Ewrop. 

Daw'r datganiad o undod gan yr arweinwyr Ewropeaidd, wrth iddi ymddangos fod yr Arlywydd Trump yn awyddus i ddarbwyllo'r Arlywydd Zelensky i ildio rhannau o dir Wcráin i Rwsia. 

Cafodd cyfarfod ei gynnal rhwng Donald Trump ac Arlywydd Rwsia, Vladimir Putin nos Wener yn Anchorage, Alaska, er mwyn ceisio dod â'r rhyfel i ben. 

Chafodd Mr Zelensky ddim gwahoddiad i'r cyfarfod hwnnw.    

Ildio tir

Yn ystod y trafodaethau hynny, mae rhai ffynonellau yn honni bod Mr Putin wedi mynnu rheolaeth lawn ar ranbarthau Donetsk a Luhansk yn Wcráin, wrth drafod yr amodau i ddod â'r rhyfel i ben. Mae milwyr Rwsia wedi meddiannu'r rhanbarthau hynny yn ystod y rhyfel. 

Yn gyfnewid am hynny, byddai Vladimir Putin yn fodlon ildio tiriogaethau eraill yn Wcráin sydd ar hyn o bryd ym meddiant milwyr Rwsia, yn ôl adroddiadau.  

Mae rhai ffynonellau o'r farn bod Mr Trump yn ystyried cefnogi'r cynllun hwnnw, a bydd yn siarad â Mr Zelensky am hynny ddydd Llun yn ystod eu cyfarfod.

Wrth benderfynu ymuno ag Arlywydd Wcráin yn Washington ddydd Llun, mae'n bosibl bod yr arweinwyr Ewropeaidd yn pryderu am y cyfarfod ddiwedd Chwefror, pan ymwelodd Mr Zelensky â'r Tŷ Gwyn ddiwethaf. 

Dwysáu wnaeth y tensiynau bryd hynny rhwng America ac Wcráin gyda Donald Trump yn tynnu ei gefnogaeth filwrol yn ôl am gyfnod.

Ers cyfarfod â Vladimir Putin nos Wener, mae'n ymddangos fod safbwynt Mr Trump wedi newid ar ffyrdd o ddod â'r rhyfel i ben. 

Mae e wedi awgrymu ei fod yn awyddus i geisio sicrhau cytundeb heddwch yn syth yn hytrach na chytuno ar amodau cadoediad yn gyntaf.  

Mae'n ymddangos mai dyna yw dymuniad Arlywydd Rwsia hefyd. 

Llun: Jordan Pettitt/PA Wire