Mae dwy o gemau'r Cymru Premier JD wedi cael eu gohirio y penwythnos hwn, a hynny oherwydd diffyg cyflenwad dŵr yn Sir y Fflint.

Roedd Cei Connah i fod i herio'r Bala, a'r Fflint fod i wynebu Hwlffordd, ond yn sgil y trafferthion dŵr yn Sir y Fflint yr wythnos hon, mae'r gemau wedi'u gohirio. 

Mae’r trafferthion wedi codi wedi i bibell ddŵr fyrstio ym Mrychdyn, yn dilyn gwaith atgyweirio dros dro ddydd Sadwrn diwethaf.

Mae’r ardaloedd wedi eu heffeithio yn cynnwys: Y Fflint, Ffynnongroyw, Maes Glas, Llannerch y Môr, Mostyn, Oakenholt, Talacre, Chwitffordd, Queensferry, Shotton, Cei Connah, Penarlâg, Mancot a Sandycroft.

Y gred yw na fydd y cyflenwadau dŵr i filoedd o gwsmeriaid yn dychwelyd tan ddydd Sul.

Mewn datganiad, fe ddywedodd Cei Connah: "Er gwaetha'r ffaith ein bod ni wedi cynnig sawl cynnig amgen i'r Bala, mae'r gêm heno wedi ei gohirio yn sgil yr argyfwng dŵr yn Sir y Fflint.

"Rydym ni wedi bod mewn trafodaethau yn gynharach heddiw ac wedi cynnig dyddiad newydd, chwarae ym Maes Tegid heddiw neu yfory, a chae niwtral. 

"Ond nid yw ein gwrthwynebwyr wedi cytuno i hynny, ac felly fe fydd dyddiad newydd yn cael ei gyhoeddi maes o law."

Ychwanegodd Clwb Pêl-droed Y Fflint: "Yn anffodus yn sgil yr ansicrwydd parhaus ynghylch cyflenwad dŵr a gafodd ei achosi gan bibell dŵr wedi ei byrsio, mae penderfyniad wedi'i wneud i ohirio gém yfory yn erbyn Hwlffordd.

"Rydym yn ymddiheuro i gefnogwyr am unrhyw anghyfleustra y mae hyn wedi ei achosi."

Mae’r tymor newydd wedi dechrau yn y modd mwyaf annisgwyl wrth i’r pencampwyr presennol, ac unig glwb proffesiynol y gynghrair, Y Seintiau Newydd golli gartref o 3-0 yn erbyn Llansawel, sef y tîm orffennodd un safle uwchben y ddau isaf y tymor diwethaf.

Hon oedd colled drymaf Y Seintiau Newydd yn y Cymru Premier JD ers pedair blynedd, a’r tro cyntaf ers wyth tymor i gewri Croesoswallt golli eu gêm agoriadol yn y gynghrair.

Roedd hi’n benwythnos da i Ben-y-bont a lwyddodd i drechu Hwlffordd er i’r blaenwr James Crole gael ei hel o’r maes ar ddechrau’r ail hanner.

Y Barri yw’r unig dîm arall i ddechrau’r ymgyrch gyda triphwynt wedi i’r Dreigiau guro Llanelli o 2-0 ar Barc Stebonheath nos Wener.

Hwn fydd y tymor olaf dan y drefn bresennol o gael 12 tîm yn y gynghrair, cyn i’r nifer o aelodau gynyddu i 16 o glybiau ar gyfer tymor 2026/27. 

Mae hynny’n golygu y bydd chwech o glybiau yn esgyn o’r ail haen ar ddiwedd y tymor hwn, a’r ddau isaf yn syrthio o’r uwch gynghrair. Bydd pedwar safle ar gael yn Ewrop ar ddiwedd y tymor hwn, cyn i’r swm hwnnw syrthio yn ôl i lawr i dri ar gyfer y flwyddyn ganlynol.

Dyma gipolwg ar y gêm arall a fydd yn cael ei chwarae nos Wener. 

Llansawel v Met Caerdydd | Nos Wener – 19:45

Bydd llanciau Llansawel yn llawn hyder ar ôl achosi sioc anferthol drwy guro’r pencampwyr yn gyfforddus ar eu tomen eu hunain ar y penwythnos agoriadol.

Hon oedd colled drymaf Y Seintiau Newydd yn y Cymru Premier JD ers pedair blynedd, gyda’r blaenwr ifanc Ruben Davies yn serennu i Lansawel wrth sgorio dwy gôl gan ychwanegu at y ddwy sgoriodd yn erbyn Adar Gleision Trethomas yng Nghwpan Nathaniel MG y penwythnos blaenorol.

Bydd Met Caerdydd ychydig yn siomedig o fod wedi gorfod rhannu’r pwyntiau gyda Chaernarfon ddydd Sadwrn wedi i’r myfyrwyr fynd ar y blaen o 2-0 yn yr hanner cyntaf, cyn ildio dwy gôl hwyr ar Gampws Cyncoed.

Sgoriodd Ryan Reynolds gôl gampus arall brynhawn Sadwrn i ychwanegu at ei gasgliad eang o goliau syfrdanol yng nghrys marŵn y myfyrwyr.

Enillodd Met Caerdydd o 5-1 yn Llansawel ar ddechrau’r tymor diwethaf, a dyna’r unig dro i’r myfyrwyr sgorio pump o goliau mewn gêm gynghrair oddi cartref ers eu dyrchafiad i’r Cymru Premier JD yn 2016.

Ond fe gafodd Llansawel ddial yng Nghampws Cyncoed ar ddydd San Steffan, gan ennill o 3-1 yn y brifddinas yn yr ornest ddiwethaf rhwng y timau.

Bydd uchafbwyntiau’r gemau ar gael ar wefannau cymdeithasol Sgorio a’r gorau o gyffro’r penwythnos ar S4C nos Lun.