Dywedodd yr Arlywydd Volodymyr Zelensky fod yn rhaid i unrhyw atebion gynnwys Wcráin, gan ychwanegu ei fod yn barod i gydweithio at "heddwch parhaol".

Daeth y cyhoeddiad am y cyfarfod ychydig oriau ar ôl i'r Arlywydd Trump awgrymu y byddai'n rhaid i'r Wcráin ildio tiriogaeth o bosib er mwyn dod â'r rhyfel i ben. 

Fe wnaeth y rhyfel ddechrau ym mis Chwefror 2022 ar ôl i Rwsia ymosod ar ei chymydog.

"Rydych chi'n edrych ar diriogaeth sydd wedi cael ei hymladd drosti am dair blynedd a hanner, mae nifer o Rwsiaid wedi marw. Mae nifer o Wcrainiaid wedi marw," meddai'r Arlywydd Trump yn y Tŷ Gwyn ddydd Gwener.

"Mae'n gymhleth iawn. Rydyn ni'n mynd i gael rhywfaint yn ôl, rydyn ni'n mynd i gael rhywfaint wedi'i gyfnewid. 

"Bydd rhywfaint o gyfnewid tiriogaethau, er lles y ddau."

Ni wnaeth Arlywydd yr Unol Daleithiau roi unrhyw fanylion pellach am y cynnig hwnnw.

Dyma'r cyfarfod cyntaf rhwng yr Unol Daleithiau a Rwsia ers 2021, pan wnaeth cyn-Arlywydd yr Unol Daleithiau, Joe Biden gwrdd â Mr Putin yn y Swistir.

Mewn datganiad ar Truth Social, dywedodd Mr Trump: "Bydd y cyfarfod hir-ddisgwyliedig rhyngof fi, fel Arlywydd yr Unol Daleithiau a'r Arlywydd Vladimir Putin, o Rwsia, yn digwydd ddydd Gwener nesaf, 15 Awst 2025, yn Nhalaith Fawr Alaska. Manylion pellach i ddilyn. Diolch am eich sylw i'r mater hwn!"

Fe gafodd y cyfarfod hefyd ei gadarnhau gan gynorthwyydd y Kremlin, Yury Ushakov, a ddywedodd y byddai'r arweinwyr yn "canolbwyntio ar drafod opsiynau ar gyfer cyflawni datrysiad heddychlon hirdymor i argyfwng Wcráin".

Ychwanegodd y gallai'r ddau arlywydd gyfarfod yn Rwsia yn y dyfodol.