Mae'r ymgyrchydd gwleidyddol dadleuol Tommy Robinson wedi'i arestio mewn cysylltiad ag ymosodiad yng ngorsaf reilffordd St Pancras yn Llundain.

Ni wnaeth Heddlu Trafnidiaeth Prydain enwi Robinson, sef Stephen Yaxley-Lennon, ond cadarnhaodd yr heddlu fod dyn 42 oed, o Swydd Bedford, wedi'i arestio am ymosodiad yn Llundain ar 28 Gorffennaf.

Dywedodd yr heddlu fod yr arestiad wedi digwydd ym Maes Awyr Luton ychydig ar ôl 18:30 ddydd Llun, yn dilyn gwybodaeth bod y dyn wedi mynd ar awyren o Faro.

Cafodd y dyn ei arestio ar amheuaeth o niwed corfforol difrifol a bydd yn cael ei gymryd i'r ddalfa i'w holi, meddai'r heddlu.

Ychwanegodd y llu eu bod wedi gwneud cais i’w holi ar ôl iddo adael am Tenerife yn oriau mân 29 Gorffennaf yn dilyn y digwyddiad.

Yr wythnos diwethaf, dywedodd Heddlu Trafnidiaeth Prydain fod gan ddyn "anafiadau difrifol ond nad ydynt yn peryglu bywyd" yn dilyn y digwyddiad yn King's Cross.

Cadarnhaodd yr heddlu yn ddiweddarach yr wythnos honno fod y dyn wedi cael ei ryddhau o'r ysbyty.