Mae dyn wedi cael ei gludo i'r ysbyty gydag anafiadau difrifol yn dilyn gwrthdrawiad ar ffordd yr A5 yn Llangollen ddydd Llun.

Cafodd y gwasanaethau brys eu galw i ardal y Berwyn Bends' ychydig ar ôl 11:40am yn dilyn adroddiad am wrthdrawiad rhwng tri cherbyd a oedd yn cynnwys beic modur Kawasaki ZZR du, fan wersylla wedi'i chofrestru yn y Swistir, a cherbyd nwyddau trwm coch. 

Cafodd y beiciwr modur ei gludo i'r ysbyty gydag anafiadau difrifol. 

Mae'r ffordd yn parhau ar gau tra bod ymchwiliadau'n parhau. 

Dywedodd y Rhingyll Alun Jones o'r Uned Troseddau Ffyrdd: "Rwy'n annog unrhyw un a welodd y gwrthdrawiad neu a oedd yn teithio ar hyd yr A5 ger Berwyn cyn 11.40 ac sydd â lluniau camera dashfwrdd i gysylltu â ni. 

"Yn ogystal, unrhyw un sydd â lluniau o'r beiciwr modur, a oedd yn teithio tua'r de yng nghwmni tri beic modur arall, neu'r cerbyd nwyddau trwm neu'r fan wersylla i gysylltu â ni." 

Dylai unrhyw un sydd â gwybodaeth a allai gynorthwyo'r ymchwiliad gysylltu dros y we neu drwy ffonio 101, gan ddyfynnu'r rhif cyfeirnod C115191.