Clywodd cwest bod dyn o ogledd Cymru wedi ceisio achub bywyd ei wraig ar ôl iddi fynd i drafferthion yn y môr ar eu gwyliau yng Ngwlad Groeg.

Bu farw Emma Jane Slack yn 54 oed wedi iddi foddi ar 9 Gorffennaf yn ardal Roda, Corfu.

Cafodd cwest i’w marwolaeth ei agor yn Rhuthun yn Sir Ddinbych ddydd Llun gan yr uwch grwner ar gyfer Dwyrain a Chanol Gogledd Cymru, John Gittins.

Roedd Mrs Slack o Ffordd Hendy, Yr Wyddgrug, a’i gŵr, Rob, ar eu gwyliau pan aeth hi i drafferthion yn y môr, meddai.

Roedd ei gŵr wedi ceisio achub ei bywyd ond fe aeth i drafferthion hefyd.

Dywedodd y crwner ei fod wedi derbyn dogfennau swyddogol o Wlad Groeg oedd yn dweud bod tonnau "ffyrnig" ar y pryd a'i bod hi wedi boddi.

Roedd corff Mrs Slack bellach wedi ei gludo adref, ychwanegodd Mr Gittins.

Cafodd y cwest ei ohirio nes bod dyddiad wedi ei bennu ar gyfer gwrandawiad pellach.