Cafodd 241 o bobl oedd yn yr awyren eu lladd pan darodd yr awyren yn erbyn coleg meddygol yn fuan wedi iddi esgyn. 

Roedd 169 yn deithwyr o India a 52 yn ddinasyddion Prydeinig, yn eu plith, Fiongal Greenlaw-Meek, 39 oed, a'i ŵr Jamie, 45 oed, a oedd yn dychwelyd i dde ddwyrain Lloegr ar ôl dathlu eu pen-blwydd priodas yn India. 

Mae mam Mr Greenlaw-Meek, Amanda Donaghey, wedi dweud wrth The Sunday Times iddi hedfan i India er mwyn ceisio darganfod gweddillion ei mab, gan ddarparu samplau DNA yn Ysbyty Ahmedabad er mwyn cynorthwyo gyda'r broses o adnabod y meirw. 

Ar ôl i'r broses honno gael ei chwblhau fis Mehefin, fe deithiodd hi o India i Loegr gydag arch ei mab.

Ond ar 5 Gorffennaf, wrth i deuluoedd Mr Greenlaw-Meek a'i ŵr Jamie baratoi i gladdu'r pâr priod gyda'i gilydd, cysylltodd yr heddlu â Ms Donaghey i ddweud fod profion a gafodd eu cynnal yn y Deyrnas Unedig yn dangos nad gweddillion Mr Greenlaw-Meek oedd yn yr arch. 

Torcalonnus 

“Dyden ni ddim yn gwybod pwy sydd yn yr arch,” meddai wrth The Sunday Times.

“Roedd gen i fy amheuon, ond roedd cael gwybod hynny yn dorcalonnus. 

“Mae'n warthus fod hyn wedi digwydd,” ychwanegodd.

“Rydym yn dymuno i Lywodraeth y Deyrnas Unedig ein cynorthwyo a gwneud popeth o fewn eu gallu i ddod â Fiongal adref.”

Daeth i'r amlwg yr wythnos diwethaf fod gweddillion sawl person yn arch dynes o Gaint a gafodd ei lladd yn y ddamwain awyren

Bu farw Shobhana Patel, 71 oed gyda'i gŵr Ashok, 74, wrth iddyn nhw ddychwelyd o daith grefyddol.

Dywedodd eu mab Miten wrth y Sunday Times Patel: “Oherwydd rhesymau crefyddol, rydym ni angen sicrhau mai fy mam yw fy mam

“Mae bod 100% sicr yn bwysig i ni.”

Cafodd cyflenwad tanwydd yr awyren Air India ei ddiffodd ychydig eiliadau cyn i'r ddamwain ddigwydd yn ôl casgliadau cynnar i’r drychineb.

Mae cofnod o leisiau'r peilotiaid yn awgrymu bod dryswch rhwng y ddau, gydag un yn gofyn pam gafodd y tanwydd ei ddiffodd, a'r llall yn gwadu gwneud hynny.