Mae timau dynion a menywod Cymru wedi sicrhau buddugoliaethau yn eu gemau agoriadol yn EuroHockey II.

Roedd y ddau dîm yn chwarae yn erbyn y Swistir, y dynion un eu herio ym Mhortiwgal a'r menywod yng Ngwlad Pwyl.

Y dynion oedd yn chwarae gyntaf ac fe ddechreuodd y tîm yn gryf iawn drwy sgorio dwy gôl o fewn y 10 munud agoriadol.

Jack Pritchard sgoriodd y gyntaf wedi iddo dderbyn y bêl o bas hir cyn sgorio yng nghornel dde isaf y rhwyd.

Rhys Bradshaw sgoriodd yr ail wedi 9 munud wrth iddo ymateb yn gyntaf ar ôl arbediad gan golwr y Swistir.

Cyn yr hanner sgoriodd Gareth Griffiths ar yr ail ymgais wedi cornel fer i Gymru.

Er i Lorenz Gassner sgorio i’r Swistir o gornel fer yn yr ail hanner, Cymru oedd yn fuddugol yn eu gêm agoriadol.

Buddugoliaeth hefyd oedd hanes y menywod yn erbyn y Swistir.

Daeth unig gôl y gêm gan y capten Beth Bingham yn y chwarter agoriadol.

Parhaodd Cymru i roi pwysau ar y Swistir am weddill yr ornest, ond heb gyrraedd cefn y rhwyd. 

Dywedod Betsan Thomas o garfan y menywod: “Aeth y gêm yn dda heddi, fi’n credu bod pawb wedi mwynhau.

“Ni’n disgwyl ‘mlaen i whare’r Weriniaeth Tsiec ddydd Llun.

“Roedd y canlyniad heddi yn un dda ac mae pawb yn hapus.”

Y Weriniaeth Tsiec yw gwrthwynebwyr nesaf y menywod, a'r Alban fydd yn wynebu'r dynion.

Mae gemau'r menywod yn cael eu ffrydio ar blatfformau digidol S4C:

28 Gorffennaf am 14:15 - Cymru yn erbyn Y Weriniaeth Tsiec

30 Gorffennaf am 10:15 - Cymru yn erbyn Lithwania

1 Awst - Amser i’w gadarnhau - Rownd gynderfynol

2 Awst - Amser i’w gadarnhau - Rownd derfynol