Roedd miloedd o bobl wedi ymgynnull yng Nghaerdydd ddydd Sadwrn i ddathlu 40 mlynedd  o orymdaith Pride Cymru yn y brifddinas.

Dywedodd Pride Cymru roedd disgwyl i 50,000 o bobl gymryd rhan yn y digwyddiad.

Fe ddechreuodd yr orymdaith am 11:00 o Stryd Porth y Gorllewin ac wedi teithio am ddwy filltir trwy’r strydoedd i orffen o flaen y castell.

Cafodd yr orymdaith ei hatal am tua 20 munud gan wrthdystiad o blaid Palesteina.

Roedd tua 50 o aelodau o grŵp o'r enw Cymru Queers for Palestine wedi rhwystro'r ffordd drwy orwedd ynghanol y ffordd.

'Cynhwysol'

Mae Pride Cymru yn hyrwyddo hawliau pobl LHDCT+.

Dywedodd Pride Cymru, yr elusen sydd yn gyfrifol am y digwyddiad ei fod yn "enghraifft bwerus o sut mae dathliad cynhwysol o fudd i'r ddinas gyfan".

Mae digwyddiadau eraill yn cael eu cynnal yn y castell dros gyfnod o ddeuddydd.

Mae'r artistiaid eleni'n cynnwys Bronwen Lewis, Ella Henderson, Kimberly Wyatt, Shola Ama, Una Healy a The Longest Johns.

Mae S4C ymhlith noddwyr Pride 2025.

Roedd nifer o ffyrdd yng nghanol y brifddinas wedi eu cau fore dydd Sadwrn ar gyfer y digwyddiad.

Llun: Pride Cymru