Byddai cynyddu cynhyrchiant ffrwythau a llysiau yn y DU yn hwb i elw ffermydd yn ôl adroddiad newydd. 

Mae astudiaeth gan elusen Green Alliance yn rhybuddio y byddai angen cynyddu faint o ffrwythau a llysiau y mae pobl yn ei fwyta 86% er mwyn cyrraedd y cyngor iechyd i fwyta pump y diwrnod. 

Ar hyn o bryd, dim ond traean o boblogaeth y DU sy'n bwyta'r swm yma. 

Mae'r adroddiad yn awgrymu y byddai hyn yn gallu cefnogi hyd at 23,520 o swyddi ychwanegol yn ogystal â chynyddu incwm ffermydd o 3% ar draws y wlad. 

Fe wnaeth ymchwilwyr awgrymu y byddai angen 113,622 hectar o dir er mwyn cynyddu cynhyrchiant garddwriaethol 86%.

Dywedodd yr adroddiad fod blaenoriaethu y diwydiant yma yn gwneud synnwyr, o ystyried y 'pwysau ar dir i gyfarfod anghenion diogelwch bwyd, hinsawdd, ynni a natur.'

'O ddifrif'

Dywedodd pennaeth amgylchedd naturiol Green Alliance Lydia Collas: "Mae angen i ni fwyta mwy o ffrwythau a llysiau i wella ein hiechyd.

“Ar hyn o bryd rydym yn mewnforio mwy na hanner ein hafalau pan mae gennym bopeth sydd ei angen arnom i fwyta afalau Prydeinig drwy gydol y flwyddyn.

"Os ydy'r Llywodraeth o ddifrif am wella iechyd pobl a sicrhau fod gan ffermwyr fywoliaeth gynaliadwy, mae angen strategaeth arddwriaeth."

Dywedodd llefarydd ar ran Adran yr Amgylchedd, Bwyd a Materion Gwledig (Defra): "Mae ein hymrwymiad i ffermwyr a thyfwyr yn parhau yn gadarn. 

"Fe fydd ein strategaeth fwyd draws-Lywodraethol yn sicrhau y gall ein system fwyd barhau i fwydo’r genedl, gwireddu ei photensial ar gyfer twf economaidd ac amddiffyn y blaned."