Mae gwasanaethau tân wedi cyhoeddi fod tanau gwyllt yn llosgi mewn sawl ardal yng Nghymru ddydd Mawrth.

Mae Gwasanaeth Tân ac Achub y Canolbarth a'r Gorllewin wedi nodi eu bod yn derbyn "nifer fawr o alwadau" yn ymwneud â thanau glaswellt.

Dywedodd fod pump o danau gwair yn llosgi ar draws yr ardal; ym Mrynberian yng Nghrymych; yn Hebron a Glandŵr ger Hendy-gwyn; yng Nghefn Rhigos ger Aberdâr a Llanllwni, Sir Gaerfyrddin.

Mae Gwasanaeth Tân De Cymru yn dweud eu bod yn brwydro â thanau yng Nghefn Golau, Tredegar, Pont-y-cymer, a'r Pandy.

Mewn neges ar gyfryngau cymdeithasol, dywedodd y gwasanaeth nad “oes angen rhagor o alwadau” gan y cyhoedd yn ymwneud â’r tanau hynny.

Yn y gogledd, mae diffoddwyr yn “ymwybodol” o dân uwchben chwarel Llanfairfechan, Sir Conwy.

Dywedodd y gwasanaeth eu bod yn “monitro’r sefyllfa”, gan ofyn i'r cyhoedd i beidio ffonio mwyach i'w hysbysu am y tan hwnnw.

Daw wedi i wasanaethau tân Cymru, fel rhan o Fwrdd Tanau Gwyllt Cymru, ryddhau datganiad yn annog y cyhoedd "i fod yn ymwybodol o beryglon tanau gwyllt dros dymhorau’r gwanwyn a'r haf."

Cyhoeddodd y Swyddfa Dywydd ddydd Mawrth, mai mis Mawrth oedd yr ail fwyaf heulog ar gofnod yng Nghymru, gyda 53% yn fwy o oriau o haul na'r cyfartaledd ar gyfer y mis.  

Llun: Gwasanaeth Tân ac Achub Gorllewin a Chanolbarth Cymru