Mae'r heddlu wedi cyhoeddi enw dynes 40 oed a gafodd ei saethu'n farw yn Nhonysguboriau, Rhondda  Cynon Taf. 

Dywedodd yr heddlu eu bod yn credu mai Joanne Penney yw'r ddynes a fu farw.

Mae dyn wedi’i arestio ar amheuaeth o'i llofruddio, ac mae e'n dal yn y ddalfa, medd yr heddlu.  

Ychwanegodd y llu y dylai preifatrwydd teulu Ms Penney gael ei barchu yn ystod y cyfnod anodd hwn.

Cafodd swyddogion o Heddlu De Cymru eu galw i’r digwyddiad yn ardal Green Park am 18:10 nos Sul, 9 Mawrth, lle’r oedd menyw 40 oed yn dioddef o anafiadau difrifol.

Aeth swyddogion a pharafeddygon Gwasanaethau Ambiwlans Cymru i'r safle hefyd.

Bu farw’r fenyw yn y fan a’r lle er gwaethaf ymdrechion y gwasanaethau brys.

Mae dyn 42 oed o Donysguboriau wedi’i arestio ar amheuaeth o lofruddiaeth ac mae yn nalfa’r heddlu ar hyn o bryd.

Mae’r ffyrdd ar gau yn yr ardal wrth i’r gwaith o gasglu tystiolaeth ac ymchwiliadau i’r amgylchiadau barhau.

Dywedodd y Ditectif Brif Arolygydd James Morris: “Rwy’n deall y pryder y bydd hyn yn ei achosi i’r gymuned leol, ac rwyf am sicrhau bod tîm o dditectifs profiadol eisoes yn gweithio’n gyflym i roi digwyddiadau neithiwr at ei gilydd.”