Mae dyn wedi ymddangos yn Llys y Goron ddydd Gwener wedi’i gyhuddo o lofruddio dyn o Wrecsam.

Cafodd Thomas Iveson, 30 oed o ardal Plas Madoc, ei gadw yn y ddalfa gan y Barnwr Rhys Rowlands yn Llys y Goron Yr Wyddgrug. 

Mae disgwyl i'w achos llys ddechrau ym mis Hydref.

Mae Iveson wedi ei gyhuddo o ladd Craig Richardson, 37, fu farw yn ei gartref ar stad Plas Madoc yn Acrefair ddydd Sul.

Dywedodd teulu Craig Richardson ei fod yn ddyn “llawn hwyl” ac y bydd “colled ar ei ôl am byth”.

“Roedd Craig yn fab, tad, brawd, ewythr, nai, cefnder, partner a ffrind cariadus i lawer ac roedden ni i gyd yn ei garu â'n holl galonnau,” medden nhw.

“Bydd pawb oedd yn adnabod Craig yn dweud fod ganddo’r galon fwyaf, y byddai’n gwneud unrhyw beth drosoch chi ac roedd yn llawn hwyl.

“Bydd colled ar ôl Craig am byth, ac yn ein calonnau am byth bythoedd.”