Mae dyn sydd yn cael ei gadw'n wystl gan Hamas ac sydd gyda theulu yn ne Cymru ar restr o wystlon i gael eu rhyddhau ddydd Sadwrn.

Dyma'r cam diweddaraf yn y cadoediad rhwng Hamas a lluoedd Israel.

Mae Stephen Brisley, brawd yng nghyfraith y gwystl Eli Sharabi, 52 oed, yn byw ym Mhen-y-bont ar Ogwr.

Cafodd chwaer Mr Brisley a'i nith eu lladd yn yr ymosodiad gwaedlyd gan Hamas ar dde Israel ar 7 Hydref, 2023.

Roedd Eli Sharabi yn byw yn Kibbutz Be'eri, lle bu'n byw gyda'i wraig Lianne, a aned ym Mhrydain, a'u merched Noiya ac Yahel. 

Roedd ei frawd Yossi yn byw drws nesaf. 

Cafodd gwraig a merched Eli Sharabi eu lladd gan Hamas yn ystod yr ymosodiad gwaedlyd yn Hydref 2023. 

Cafodd y ddau frawd eu cipio fel gwystlon ond bu farw Yossi'n ddiweddarach tra'r oedd yn gaeth.

Cafodd 1,200 o bobl eu lladd yn yr ymosodiad gan Hamas ar ddechrau mis Hydref 2023. 

Fe aeth lluoedd Israel ymlaen i ymosod ar Gaza o ganlyniad, gan ladd degau o filoedd o Balestiniaid yn ystod eu hymgyrch filwrol.

Y ddau wystl arall ar restr Hamas sydd i gael eu rhyddhau ddydd Sadwrn yw Ohad Ben Ami, 56 oed, ac Or Levy, 34 oed.

Hyd yma, mae 18 o wystlon Iddewig wedi cael eu rhyddhau ers dechrau'r cadoediad ar 19 Ionawr - gyda'r gobaith y bydd 33 o wystlon i gyd wedi eu rhyddhau yn ystod cam cyntaf y cadoediad.

Fel rhan o'r cytundeb, mae disgwyl i 1,900 o garcharorion Palesteinaidd gael eu rhyddhau gan Israel hefyd.